人民幣越升越強，美國佬嗌晒救命，久唔久就勸北京放寬滙率。喺內地超活躍嘅前摩根士丹利首席亞洲經濟分析師Andy謝國忠（圖），卒之度到條橋。佢喺內地報章《南方周末》撰文話，人民幣唔使大調整，假如要升20%，都可以曲線完成，一係加強環保；二係取消對加工行業某啲補貼；三係提高最低工資。之不過，Andy冇講呢三招點掂，華華尤其唔明加強環保嘅效益。
Andy又話，人民幣滙率問題係炒家誇大咗，冇人知合理滙價。佢仲將亞洲金融風暴嘅搞手索羅斯潤一劑，話索羅斯94年睇大馬貨幣升，兩年後又唱貶值，證明市場有時都犯大錯。
大潑中央冷水
人民幣咁強，Andy認為係外貿順差，並非高利率帶嚟。佢估計內地通脹持續至明年下半年，但當通賬過7%，阿爺就會加息，美國步入衰退，中國出口或會下跌，屆時內地資產價格實回落。
至於中國近排好積極投資海外，例如入股黑石，Andy潑冷水話，政府投資一般唔成功。新加坡嘅淡馬錫20年嚟嘅收益唔高，投資喺泰國仲蝕好多，佢勸中央對政府部門能做乜嘢非常小心。