仲有一日，英超就開波，呢邊廂8號仔嘅now，出盡奶力搶客上台，那邊廂冇咗鎮台之寶嘅K寶，又推10蚊台又有世運，但都仲係成間冇咗紅牌阿姑嘅夜總會咁款──唔算好留到客！更慘情嘅係，呢排環繞K寶班用戶嘅話題，熱爆嘅「點樣先可以cut到K寶」，繼續排行榜首，近日更有人終於搵到唔使勞氣又好work嘅方法！
華華聽老死波牛成講，辦法其實好簡單，先畀13蚊，寄一封掛號信畀K寶，講明自己需要申請停止服務，但同時緊記、緊記，再畀多13蚊掛號，將呢封信（當然亦可以平郵）CC埋畀電訊管理局。
平時乜都管唔到嘅電管局，唔知點解又會以超強效率，幫閣下好認真跟進，K寶亦會以極速幫你終止服務，咁計計條數，平郵需要1.4蚊，掛號呢最平就13蚊，即係話唔使廿皮，就可以同K寶分到手，呢個方法，絕對係經過臨床實驗證明，冇老點！
今日派成績走唔甩
查實華華唔係話幫邊個，亦唔會鼓勵K寶啲客，cutK寶轉去now，只係消費者幾時都有權選擇，但當個客真係決定咗要轉會嘅時候，咪大家好來好去囉，整乜要俾人成日port去投訴版，破壞晒公司形象呢！反正你哋又有10蚊睇一世，又播世運，始終香港地都仲有好多人鍾意睇阿蘇煮嘢同聽施明講鬼古，人客水流柴，舊嘅唔去，新嘅又點嚟呢？
話時話，K寶今日下晝派成績表，到時海哥吳天海應該俾傳媒摔到暈，其實咩行業都好，最好係百花齊放，各有各做，唔一定要片死對方，華華誠心希望，海哥快啲重振K寶雄風，同二少一較高下，造福我哋呢啲消費者！
[email protected]