王喜喺無綫劇集《爸爸閉翳》中飾演一個二十四孝老竇，不過就成日頭頭碰着黑，估唔到佢喺現實生活中都發生閉翳事。話說前日佢同一班朋友去大嶼山拜神，回程時喺東涌地鐵站商場入面嘅M字頭漢堡包連鎖店開餐，王喜叫咗個雞肉包醫肚，點知佢食食吓，竟然咬到一塊摺叠咗、即係曾經用過嘅藥水膠布，嚇到佢三魂唔見七魄，即刻打電話去食環署投訴。
咬極咬唔開
馮仁昭噚日同王喜傾開電話，佢依然猶有餘悸，話事發後越諗越作嘔，佢話：「我食緊雞肉包嗰陣，咬到一塊嘢，咬極都咬唔開，我仲用上下齒細細咀嚼，睇吓做乜咬唔開啦，後尾我拎塊嘢出嚟睇，竟然係一塊頭尾對摺咗嘅藥水膠布，我係非常震驚同憤怒，但依然保持冷靜同禮貌，同當值嘅M記店員投訴。」
王喜話店員聽完投訴後入咗廚房，一分鐘後步出時答佢廚房入面冇人受傷，然後就拎走咗塊膠布，唔肯俾佢影相做証據，話要攞去化驗，冇耐食肆經理到場致歉，但王喜覺得點解釋都係於事無補，所以打電話去食環署反映。
王喜仲冇厘心機咁話：「呢一刻都仲係覺得好污糟，好擔心呀，除咗割損手之外，灰甲、主婦手、病態咬損手指嘅人都會黐膠布，總之覺得好作嘔，咁大間食肆發生呢啲事，係好大嘅危機，我諗大人陪細路仔去食嘢時先要檢查食物，大人就要增強抵抗力先至好食，如果唔係都好閉翳。」
