各位擁躉好！「蘋果開倉」眾名家今季繼續喺將軍澳堆填區旁緊守崗位，同大家閒話家常講貼士；今次英國波開鑼日，就推介兩隊小弟心水嘅英冠升班熱門供大家參考，捧查爾頓同修咸頓W。
季初波同季初馬一樣，一定難賭，所以注碼絕不能大，因為任熱身賽如何強勁，如馬匹試大閘一樣，都係未跑過唔知乜料；所以我認同牽牛兄今天頭版貼士，唔會博友賽之王熱刺作客贏到新特蘭。
英超吼布力般W
呢類情況，勸熱刺躉華度兄，買感情票不如向單W埋手仲合值博率；而自己全日英超重心推介，必是布力般作客打贏米杜士堡。外圍莊家原本一兩個星期前開出布力般仲有受讓下盤買；現在馬會專家開出平手盤，個人轉減注博單W，隊波今季鋒力強，小心成為奪標黑馬，今場有2.6倍W賭仲妙。
講番英冠，查爾頓今夏走咗前鋒賓特、中場羅美度同埋後衞靴達臣等實力球員，但補入嘅球員好似前鋒托度洛夫同埋門將韋化咁，一啲都唔失禮；今場對住冇咗射手比利沙柏嘅升班馬斯肯索普，應該實食冇黐牙。
全日鋼膽修咸頓
修咸頓一對前鋒堅韋尼鍾斯同埋拉斯亞克，今夏一直成為各中型班嘅羅致對象，單憑呢點就知佢哋有料。既然修頓留得住佢哋，加上今場對手水晶宮今屆只值中游位置，就算主隊守力似減弱，都唔怕作客攻力一般嘅「水」兵。馬會單W得1.8倍，全日鋼膽。
講開英超，愛隊阿仙奴今屆備受各方看淡，但個人仍然信心高漲，尤其喺賭博角度，可能稍為退熱，更見值博；首戰就博班生牯仔大炒富咸，一注波膽「主其他」，開出必石破天驚！米雪，大哥忠、柏棋撐我呀！
近5場往績：/
蘋果波神
沒有成功，沒有失敗，最重要你是否仍然享受箇中樂趣，否則不如不玩好了。