時裝設計師鄧達智與「九龍皇帝」曾灶財本來風馬牛不相及，因為香港經歷97回歸這個轉捩點，為了結集回憶，William選用街頭文化做靈感，把皇帝的墨寶跟時裝crossover，成為時裝界一時佳話。皇帝上月駕崩，痛失好友的William當然要向他致敬，因為全憑曾灶財，才令William發現時裝的靈感近在咫尺。 撰文：比華利
香港土產時裝設計師鄧達智（William）和「九龍皇帝」曾灶財相識超過30載，10年前鄧達智把財叔的塗鴉和時裝作crossover，甚受注目，可惜這位「皇帝」上月15日已經駕崩，終年86歲。
回想初初對財叔的印象，William說：「其實我讀中學時已經喺港九好多地方見過財叔嘅塗鴉，記得70年代政府廣泛宣傳清潔香港，所以仲係𡃁仔嘅我，當年見到財叔四圍寫字，有啲嫌佢整污糟地方。」
相識 叉燒飯結忘年交
中學以後，William到了英國進修，直至85年才回港發展時裝事業，當時他仍是寂寂無聞的時裝設計師，每天都在觀塘和新蒲崗一帶的工廠區上班，路過街頭經常看到財叔雖然行動不便，但仍風雨不改拿着毛筆在牆上努力寫。財叔的那份固執，以及別樹一幟的字體都教William充滿好奇。某日，William上前跟財叔搭訕，他說：「我問咗佢好多嘢，但財叔第一句竟然話：『你買盒飯嚟食吓先再傾』。」就是這樣，William以一盒美味的叉燒飯跟曾灶財成為忘年之交。
William續說：「財叔份人好樂觀，又樂天知命，係一個開心人，雖然我從佢言談之間感覺到佢嘅精神有少少問題。佢一把年紀，性格就好似細路仔咁，好貪玩，可惜財叔嘅記性唔好，無論你同佢接觸幾多次，下次再傾偈，佢一樣唔記得你係邊個，要重新講一次。」William指曾灶財有一次出席時尚雜誌《號外》頒獎禮時，他爆粗一句：「你黐X線，我啲字靚？」令William看到他無時無刻的自我個性。
回歸 街頭文化作回憶
10年前為迎接97回歸，William特別以財叔的街頭塗鴉作為時裝設計的靈感，他說：「嗰時我好想設計一系列時裝做紀念，財叔成日用佢嘅文字喺街頭向英女皇抗議，97回歸後，我好想知佢係咪仍然會對中國政府有相同態度。結果我邀請財叔選用佢嘅特色字體同時裝大玩crossover，兩樣嘢加埋一齊，原來好有震撼力。今年香港眨眼就回歸咗10年，我就再用曾灶財嘅文字設計咗另一批新衫喺今年初展出。我半年前籌備以九龍皇帝嘅系列，準備今個月喺沙田香港文化博物館參加『潮──香港時裝設計』，估唔到財叔上個月病逝，於是呢次展覽就變成紀念佢。」
死後 靈堂冷清難過問
上月曾灶財逝世，傳媒大事報道，不過其遺屬處理財叔的身後事卻十分低調，在世界殯儀館的靈堂沒任何佈置，遺照也欠奉，更不見其家人現身，場面非常冷清，有消息指財叔遺屬早已在醫院替他辦理好後事，並把遺體葬在和合石。
生前備受注目的財叔，死後冷冷清清，似乎非常諷刺。William說：「某程度上，財叔都係俾家人遺棄過，但畢竟遺體係屬於佢嘅家人，我哋唔可以過問，我哋都要尊重死者。」
失去財叔這位老朋友，William十分難過，他說：「其實我要向佢致敬，係佢嘅塗鴉激起我重新思考靈感到底係乜嘢，佢原來唔係高深，唔係高貴嘅嘢，靈感係隨時喺我哋身邊出現嘅事物。」
攝影：陳慧安
髮型：VickKwanofHairCulture
示範：馬詩慧
馬詩慧：塗鴉時裝獨特
名模馬詩慧（Janet）出道以來，一直與時裝設計師鄧達智合作無間，所以當他每次有重頭戲，這位愛將必佔一席位。
Janet穿上William以曾灶財街頭塗鴉設計成的服裝，她隨意的舉手投足，已散發一股攝人的名模風範，充滿魅力。Janet先後演繹五套曾灶財系列時裝，各具美態，尤其她把一襲吊帶低胸紗裙的裙襬像蝴蝶一樣展翅，感覺非常飄逸。
到底Janet對這位傳奇人物了解有幾多？她日前說：「我對佢唔係咁多認識，最初係William用佢嘅特色文字設計嘅服裝，由佢搵我着開始，我覺得用呢啲街頭文化糅合落時裝裏面，另有一番味道。之後，我喺天星碼頭附近都見過曾灶財嘅手筆。」
娛樂資料庫：御書舞台路
曾灶財生前在港遺下不少「御書」，早於97年，鄧達智已將之注入作品中，並迅速在國際引來迴響，令這位九龍皇帝成功衝出九龍，進軍國際！
97年1月
鄧達智設計名為「九龍皇帝」的時裝系列，表達97年回歸前後的心情，壓軸之作是一件長達50米的服飾，並迅速在國際揚名。但因這批創作未經原創者同意，引起版權爭議。
01年1月（圖）
曾灶財在「《號外》生活概念創意大賞2001」頒獎典禮上，獲頒創意靈感大賞，並由鄧達智頒獎，曾灶財還即場寫大字。
07年1月
鄧達智在貿發局的時裝展上舉行「九龍皇帝十年回顧」，展出一系列以曾灶財字體設計的時裝，並請來余慕蓮穿上「九龍皇帝」樣式的晚裝行天橋，掀起高潮。
07年8月
沙田香港文化博物館於本月18日至明年3月，舉行「潮——香港時裝設計」，鄧達智將展出97年之作「九龍皇帝」系列時裝，紀念這位非一般皇帝。
資料提供：《蘋果》資料室
