本城型人型事近日有新指標，出tee。
Wearewhatwewear，今時今日，有想法有態度，講出口略嫌老土，印上tee掛心口，路人皆收到，平凡物事沾上tee類物料，連愛豬扒愛魚蛋都嘭一聲變型仔嗜好。Tee型當道，茶餐廳出tee，兜口兜面照抄悶爆ILoveNYlogo一樣賣斷市；家陣連書店都出tee，件件仲有名有紋路有concept。所以話香港，唔怕冇tee買，最怕着唔晒。
記者：劉嘉蕙 攝影：周旭文、譚盈傑
卓韻芝 「成功之下總有失敗」
我話書得起4周年感動，因為卓韻芝。話說記者臨急臨忙call人做訪問，找得着阿芝時已近深夜時分，想約阿芝影相，佢原來第二朝趕上機，行李未執錄音未搞掂，記者原打算退而求planB，借PR相充撐，點知阿芝主動提出完美planC，「我帶埋件tee去到嗰邊影相e-mail畀你。」兩日後相send到，挪威的天空美麗放送，睇得出阿芝幾支持件事。撐到咁盡，原來阿芝原先唔識老細，「書得起開張不久我就有幫襯，有時行過銅鑼灣發姣都會走上去，揭吓攝影集設計書搵到好多靈感，不過未同老細打過招呼。」阿芝跟老細結緣不在書屋，卻在網上，「有次我寫專欄，提到寫作時常不自覺犯下TYPO，隔幾日收到陌生讀者e-mail話自己都有同感，再隔一排，有人找我設計tee，原來那陌生讀者就是Joey。」
此行幫拖畫tee，阿芝話自己畫畫唔叻，惟有大玩「WIN」及「FAIL」二字，先寫FAIL，再以WIN字蓋過，代表成功之下總有失敗，阿芝說在乎你睇到邊一面，所以做人不要怕面對失敗，「很多年輕人不敢在人前表達自己，不敢暴露自己弱點，其實失敗都是你的一部份，不要怕承認失敗。」
書得起打不死 4歲仔
香港搞樓上書店幾近革命事業，沙士後開張的書得起獨沽一味賣設計書，不賣流行讀物唔玩減價，居然撐到剛滿4歲生日，簡直感人肺腑。老闆JoeyHo讀建築出身去賣書，不會講生意經，自言視書店如BB，由其天生天養自會發展獨特個性，「書店會跟着城市性格發展，毋須太着意經營一種方式。尤其港人脈搏快，陳列書目最好常轉換。另外，開店之初我較強調將書仔細歸類，後來發覺隨意擺放也有好處，因喜歡設計的人都好奇心旺盛。」
設計師都愛書得起，因為老闆大方，設計書開放任睇不在話下，難得書房空間都可以任人舞，「誰想在這裏搞展覽，我就把場地放手交給他，改佈置改陳設我都不管，有澳洲設計師在門外走廊留下大幅graffiti，搞到管理員來罵，我也不介意，覺得這樣更有趣。」有趣到底是趁4周年出tee，連老闆在內10個創作單位，各自演繹「書得起，打不死」精神，名單包括卓韻芝及小克等炙手可熱人選，生日party當晚更齊齊現身慶賀。
書得起打不死4周年紀念tee
售價：每件$198（每款限量50件，收益撥捐香港設計師協會作推廣設計用途）
地址：銅鑼灣軒尼詩道439號香島大廈1樓A座
電話：21267533
*想一次過睇晒10件tee，除走上書店，下個月中更於LCX搞展覽，不妨逛逛。
展覽日期：16/9-15/10 地點：尖沙嘴LCXXPLUS展區
Prudence@ChocolateRain「我輸唔起，會喊」
Prudence跟Joey在香港設計師協會相識，二人老友鬼鬼，Prudence更主動情商LCX借出場地，於9月展出全套10件tee，「Joey讀建築卻走去搞書店，佢份人低調唔識宣傳，所以一定要支持。我舊年出書，想找書店做小型展覽，未開聲，Joey已拍心口幫我，好感動。」
開SOHO地舖前，Prudence開過二樓精品店，每次上書得起特別感同身受，「做二樓真係好慘，坐足幾年都冇人知你喺度。」她說女仔其實輸唔起，遇挫折會喊，故tee上畫了淚眼ChocolateRain，但擰去背面又是美好明天，「喊唔緊要，最緊要喊完會爬番起身，繼續發夢，繼續向夢想前行。」
Arther@CHILLICHILLY「心口有個勇字」
贈興tee大群設計師賀壽，老闆Joey話：「我特別選最有打拼感覺的人。」由3名設計師組成的家品品牌CHILLICHILLY絕對是打拼分子，為發展設計生產一條龍北上開廠，成員之一Arther日日中港兩邊走，他們的poloshirt，紅色刺繡圖案貌似Burberry，原來是關公騎馬，另加心口有個勇字，沒抄楊千嬅，「清末士兵背上都有勇字，加埋關公標記，有打不死精神。」
朱力行「能屈能伸就係輸得起」
新媒體藝術家朱力行的設計有一行行黑色虛線，近看原來是「由此剪開」痕，「我想輸得起的精神暗喻一種能屈能伸的素質，如港人冇錢時，會賣車賣樓，努力變通，要夠flexible才輸得起。」朱力行解釋。這件tee可以着又可以剪，短袖變冇袖，有領變V領，「生活環境變差，可以沿虛線剪幾忽衫，放下身段由頭再嚟過。」
