美股「無形之手」又再演功架！道指承接上日（周二）力挽狂瀾於既倒──質極都要浮番上水面，最終收升35點後，周三甫開市，有心人已利用思科（Cisco）業績表現超理想，引發納指及標普500指數急升，再使勁托它一把，道指便即高開70多點，之後大部份時間都在高位徘徊。
午後，一開波便坐火箭，道指一度升近190點，這個「訊號」嚇到班淡友退避三舍。然則見唔多似隻怪手做嘢之手法，遂逐格壓低，點知越壓越過癮，道指徐徐滑落至倒跌13點，淡友爽到唔識形容。筆者還以為瘋癲一日、托住一日、休息番一日，也屬正常，眼見快將收市仲未見「無形之手」，肯定還在食緊個longlunch兼嗒緊紅酒吧！
豈料臨收市前7分鐘，隻「手」突然掩至伸出嚟「喪」掃，短短時間，道指竟然倒升153點收市。世間上竟有如此深厚功力之武藝，讀者/投資者若不信，請睇吓個dailychart。
別以為冠一日日在講古仔，只是想提醒閣下，市況是何等凶險。由04年6月聯儲局開始加息，至去年3月停止公佈貨幣供應M3，以至11月的國會中期選舉，到今年次按信貸泡沫爆破，美股走的只是單程路（上升），連一次似模似樣的調整也欠奉。好像這次僅跌7%，便急不及待將大部份失地收復，難道美經濟、美股前景真的一片秀麗？是個市抑或冠一不正常，甚或傳統智慧已不管用？
不過，這齣不滅神話雖然落幕無期，然期間編導者使出招數之出神入化、功力之高深莫測，實教外界折服兼大開眼界。全球化之作用，原來如此！