叫人嗌佢Richard嘅李澤楷，將盈科保險賣咗畀華比富通之後，番薯丸袁天凡已經少咗同傳媒見面。噚日盈保正式改名為FORTIS嘅大好日子，華華同番薯丸傾咗一陣，佢未講嘢先派兩張卡片，一張係FORTIS高級顧問；另一張係盈科亞洲拓展副主席，即係佢仲幫緊Richard啦。
講開Richard，番薯丸話佢係少數具備國際視野嘅企業家，兼肯自己做功課。番薯丸舉咗個例，今年初Richard覺到全球經濟大環境有啲唔妥，於是乎即刻走去拜會四名全球有名嘅經濟學家：LarrySummers（前美國財長兼前哈佛大學校長）、JeffreySachs（哥倫比亞大學教授)、MyronScholes（97年諾貝爾經濟學獎得主）同埋竹中平藏（前日本財長）。
四學者專長財務市場
咁Richard有啲乜嘢得着呢？番薯丸就點都唔肯講，只係話睇吓年中開始市場嘅變化就知。但就補充話Richard每逢有大動作嘅時候，就會四出「問道」，咁𠵱家經已係8月，好似仲未見到李生有乜風吹草動，唔通今次係比舊年賣8號仔更大嘅動作？需要更多時間部署？
冇辦法，華華都惟有請教吓人，問一名番書仔，佢話四個學者嘅專長都係搞宏觀經濟同財務市場，若果見晒四個睇怕都係講資金流向同埋企業信貸，所以佢估會同美次按風暴有關，Richard係咪咁勁，華華真係唔敢講。
噚日對番薯丸原來仲有另一個意義，就係會考放榜，原來當年讀九龍華仁嘅袁天凡亦係高材生，會考中文、數學同物理都係揸火箭。佢仲以典型香港仔心態勉勵大家，讀書同做嘢都好，要爭當然要爭第一，若果每次只係抱住攞第二就算嘅心態，永遠唔會成功。當然，若果最終只係攞第二，自己都會好開心，因為知道盡咗力，最緊要明白「youarethebest」嘅道理。
[email protected]