等到花兒也謝了，英超終於喺禮拜六kickoff！各位睇咗咁多年英超嘅球迷，相信等到頸長又身痕。不過，今季對香港球迷嚟講，可能別有一番感受，事關陪伴球迷多年嘅指定直播電視台「畸寶」，俾「現在」搶咗獨家直播權後，首次同我哋見面。英國波照踢，香港大變天！
精華片段朝早先有
「現在」大堆頭搞直播，當然要搞到有聲有色與別不同，務求令觀眾感到無限新鮮；佢哋一嚟就高調宣傳「四分割」畫面功能，觀眾可以喺一個螢幕享受同一時間睇4場波嘅官能刺激，而且我哋仲可以揀選聽邊個台旁述㖭！不過，球迷要留意係，即日精華片段會同「畸寶」時代唔同，「現在」會喺清晨六點九分先至播，建議英超迷瞓一陣先起身，免得眼光光等到天光。
夢幻拍檔再放笑彈
另外，每個時段嘅主打直播，「現在」都安排3個講波佬負責評述賽事，好似開「咧」戰新特蘭對熱刺，就係由丁偉傑、蔡育瑜同鄭兆聰評述，但我求大俠特別留意到稍後播嘅保頓主場鬥紐卡素，事關由「三色台」過檔嘅「招積」曾偉忠將處男登場，連同當年鬧出「金猴笑話」嘅蔡育瑜再組「夢幻組合」，加埋陳炳安，可能齊齊大放笑彈！
講到呢度，或者年輕球迷唔係好知發生乜事，我求大俠不厭其煩簡言之。話說當年兩位仲喺「三色台」講波佬時，竟喺一次節目中，將獎品「足金金猴」講成「足金x猴」，成為全城笑柄，
想回憶當年趣聞，球迷可到youtube搜尋《賀年送金猴》或直接從此連結 http://www.youtube.com/watch?v=DAqeKpH8_4w欣賞，懷緬一番！