美國DiscoveryChannel熱到爆嘅真人騷《AmericanChoppers》（港譯：超炫美式機車），雖則內容好簡單，只係圍繞OrangeCountry一間父子經營嘅電單車行入面發生嘅人與事，製作人原本係想講啲人點樣由零開始做一架電單車，但後來主角PaulTeutul幾父子之間引發出嘅火花同互動關係更受觀眾歡迎，結果人仲紅過啲機車，仲被封做美國勞工階層英雄㖭！
記者：梁美甜
搵羅素高爾做伴遊
今晚起一連三個禮拜四，PaulTeutul同兩個仔PaulJr、Mikey會走到澳洲玩餐飽，最巴閉嘅係佢哋搵到祖籍澳洲嘅金像影帝RussellCrowe（羅素高爾）做伴遊，仲揸機車穿梭影帝個農場兼同影帝嘅球隊對戰，幾日玩盡悉尼同西岸，拍成《超炫美式機車：澳洲》，遊住埠嚟工作簡直係超筍！
玩盡上天下海
去得澳洲，又點可以錯過當地最出名嘅陽光與海灘？今晚第一集佢哋幾仔爺加埋都一把年紀，不過就齊齊攞起板去BondiBeach學衝浪兼玩盡大堡礁；成班人畏高都要去爬最高有134公尺嘅悉尼大橋；仲揸機車闖入農鄉兼暢遊影帝個農場，羅素仲提議佢哋創造一架富有澳洲特色嘅機車俾佢㖭，唔知佢哋肯唔肯畀面呢？
《超炫美式機車：澳洲》
播映日期：8月9日起逢星期四，一連三集。
播映時間：8:00pm
播放頻道：DiscoveryChannel