銅鑼灣向來好多好嘢食，單是短短一條登龍街，已有近20多間食肆，中日西餐、海鮮火鍋樣樣齊！今日就等我哋掃勻登龍街，由芝士火鍋、鴨胸焗三色飯食到四川炒辣蟹等等，最後當然連特色甜品都嘆埋，總之好食嘅都唔放過，一日勁食N餐！
記者：馮冠芝
攝影：陳細權、林栢鈞、伍慶泉
Model：Maggie
1.姑姐餸菜任配搭
行到登龍街，小記的視線立時被粉紅色「卡娃兒」的女仔頭吸引！點解會叫「姨媽姑姐」？講落有段古：老闆娘的姪兒來搵她，「姑姐、姑姐」的喚着，叫叫吓，連帶夥計、熟客都叫埋一份！做得大眾姑姐，當然識整番幾味𠱁「細路」啦！
泡菜雞絲冷麵$40
用自家醃製的泡菜，沒有韓式泡菜般濃烈，選用娃娃菜口感爽嫩，與雞絲冷麵甚襯！添上秘製的麻醬，清辣化膩，醬清有濃香芝麻味，原來秘訣在於此麻醬加了wasabi及日本醋，唔怪得啦！
黑武士$35
黑色向來予人神秘冷漠之感，但這個黑武士卻sweet到爆！摻有可可米的朱古力雪糕、以焦糖煮過的車厘子、吸了雪糕的凉粉，每一啖，朱古力侵佔口腔每個角落，甜到入心呀！
咖喱煙鴨胸拼粟米汁魚柳焗三色飯
$50（套餐價，配湯)
DIY指的是任由顧客自行配搭餸菜、醬汁及麵飯。小記建議選咖喱汁，師傅先炒香蔬菜收水，然後加咖喱，出嚟個汁質感似沙嗲，香而不辣！配上由珍珠米、紅糙米及糙米混合的三色飯，煙韌有咬口。不得不提的是每客焗飯，姑姐都私人醒大家炸洋葱條，炸漿薄薄一層，咬下香脆外皮，洋葱汁四溢！
姨媽姑姐（28381985）
地址：登龍街32號
營業時間：周一至四12:00nn-12:00mn、周五至日12:00nn-1:00am
座位：2層約60個
2.藍芝士至啱港人口味
探完姑姐行過兩步，一陣香濃的芝士味教小記停下腳步！原來係波波茶坊的藍芝士火鍋！老闆試了十多款芝士，終於發現以藍芝士（bluecheese）做火鍋最適合香港人口味！除了藍芝士，火鍋湯底更加了平時pizza用的馬穌里拉芝士及白酒，將食物放入去會牽出一絲絲芝士！
桶蠔海鮮藍芝士火鍋$118
香濃的藍芝士，配以大大隻creamy桶蠔，活像自製芝士焗生蠔。
黃金軟殼蟹煙鴨胸炒飯$70（套餐連湯、飲品)
這裏的軟殼蟹足100g，大隻得嚟仲炸得香脆，爽到爆！配上惹味鴨胸，有海鮮有肉，最啱貪心的小記。
波波茶坊（21559821）
地址：登龍街14號
營業時間：12:30pm-11:30am
座位：2層共50個
3.夜鬼好去處
解決了午、晚餐，行一陣，返轉頭再消夜。呢間新開的日本餐廳開到凌晨3點，晚上9點後仲有好多優惠，絕對係夜鬼好去處。
日式餃子炸魚皮定食$49
望見老闆一碟碟放上枱，以為自己眼花！一個定食有蟹子沙津、雜錦手卷、麵豉湯、鰻魚汁燒炒飯、手磨紅豆沙，當然唔少得主菜日式餃子炸魚皮。魚皮炸得香脆，紅豆沙滑不溜口，豆渣都冇！
四川香辣蟹$180/斤
（9點後消夜價，原價：$260/斤）
又話日本料理？一隻正宗四川風味的蟹卻在這兒散發辣香味！用40多種香料調配的辣醬，辣香卻不掩蟹的鮮甜。
銀菱日本料理（28277228）
地址：登龍街3號
營業時間：11:00am-3:00am
座位：約30個
4.米線湯底夠鮮甜
過橋米線$40
米線店要令人留下印象，湯底極為重要！少了一層保溫油，店員快速將鮮牛、雞等放進湯煮熱！呷一口湯，響螺的鮮甜與雞的濃味在口中迴盪，雞肉有陣陣酒香，既鮮且甜。
招牌普洱牛油雞翼$29
只叫了一客，牛油蒜香味已瀰漫店中每一角落！雞翼沾上薄薄脆漿炸至金黃色，再以牛油蒜頭普洱煎香。食到滿嘴香，咬到最後雞翼依舊肉鮮汁甜，怪不得聞名遐邇。
滇雲南米線專門店（25758677）
地址：登龍街45號
營業時間：11:30am-12:00pm
座位：41個
5.有利腐乳王
食飽飽，漫無目的逛吓幫助消化，又意外地發現好嘢！在登龍街及堅拿道東交界，有間賣腐乳的老字號─有利腐乳王。此店最出名的辣椒腐乳（中裝$34），用加拿大豆製，豆味香濃，買罐返去𠱁吓媽媽先得！
6.上海老三陽
行到街尾，還有上海老三陽（44A舖），嗜蟹的朋友千祈咪錯過。雖然𠵱家大閘蟹唔當造，但買隻「六月黃」返去嘆吓都好！
7.大利行酒吧大廈
買完手信，意猶未盡，登龍街最後一擊！走入2號的大利行商業大廈，成幢有20多間酒吧！想飲番杯直落大把選擇；可惜小記已筋疲力盡，惟有說聲：登龍街，下回再戰吧！
