經紀Ｓ做咗行政總裁，左丁山以電話賀之，經紀Ｓ話：「改吓銜頭啫，實質上工作並無不同，唔使賀嚟賀去。」經紀Ｓ讀完中學就做記者，後因財經採訪而進入經紀行，現在成為獨當一面嘅人物，值得老友為佢高興。
適逢此間有消息靈通報紙報道金管局任總裁密函游說中央，提出三個建議搞Ａ股Ｈ股套戥，以平衡Ａ股Ｈ股價格，左丁山於是問吓經紀Ｓ嘅意見。經紀Ｓ問：「既稱密函，上書中央，何以會在報紙曝光？」呢樣嘢，左丁山唔識答，人哋寫得出，自然有根據，正是信不信由得你，金管局既然冇斷然否認，咁就算係真嘅啦。經紀Ｓ對金管局三個建議，原則上認為不可行，主要理由係人民幣未能自由兌換，內地資本賬未開放，兩地股民如何可以套戥？經紀Ｓ話：「阿Paul（港交所總裁）對此最有認識，佢話目前套戥存在困難，我梗係信佢多過信任總裁啦。任總裁做咗三十年高官，都未試過做經紀買賣股票！」
金管局三建議之中，第三項係設立非牟利公共機構，負責進行套戥。乜嘢係非牟利機構呀？金管局都要牟利，每年貢獻庫房嘅噃！東華三院呀？還是保良局？設立一個新嘅非牟利公共機構，咪又係增設新官僚機構，安置退休高官！老實講，私人證券行、投資銀行、基金等等都唔知幾識得套戥，例如滙豐倫敦與滙豐香港嘅股價一旦背馳，就立即引發套戥活動，邊度需要一個非牟利公共機構去出手吖。一旦成立，呢個機構一定不斷膨脹，與私營機構爭飯食，最恐怖嘅，就係他日只准呢個新機構進行ＡＨ股套戥，不准私人機構套戥。
金管局監管銀行業務，理所當然，但意圖插手管理ＡＨ股套戥，好似係冇嘢搵嘢做。證監會聽講不時研究ＡＨ股差價問題，發現流量量大（即貨源多）嘅Ａ股，其ＡＨ股差價就會細啲，換句話說。只要中央在這方面願意放寬嘅話，ＡＨ差價已經可以收窄，未必需要在資本賬未開放、人民幣未自由兌換情況之下搞套戥。