奧運馬術賽預賽喺八月十一、十二、十三日舉行，馬主N話：「人一世，物一世，奧運馬術第一次喺香港比賽，好可能係空前絕後嘅一次，你去唔去現場觀賞預賽？」本來係想嘅，但馬主N加多一句：「要當睇晨操咁，早上五點就要起身去嘅嘞？」左丁山當堂為之一窒，星期六、日要咁早起身？難啲喎，諗真吓先。
次日睇報紙，詳列入場規矩，包括：（一）早上六時半開賽，觀眾要提早個多小時進場；（二）唔准帶水帶遮帶食物；（三）熄手機；（四）不宜穿着鮮色衣服；（五）到火車站坐穿梭巴士入場。
咁多條件，觀眾辛苦啲喎，於是打電話畀馬主N：「都係唔去睇預賽咯。」馬主N話：「少你一個唔少，公眾入場票已經沽清。你以後都未必有機會。」應該係嘅，日本在一九六四年辦過東京奧運，至今未辦過第二次，中國辦完二○○八年北京奧運，怕且等多起碼五、六十年。倫敦就等咗六十四年先至可以第二次主辦奧運，左丁山呢世人應該唔會見到中國辦第二次奧運，即使有第二次，馬術賽都唔會再次在香港舉行啦。
睇唔睇奧運馬術賽，明年再決定啦，或者到咗明年八月，可以攞定幾個星期假期呢！馬術賽預賽期間，香港選手會參加盛裝舞步、場地障礙賽及越野賽，因為平時香港冇越野賽場地，根本冇法子訓練選手，直至彭福公園內今年起好一條越野賽訓練場之後，香港馬術選手先至有場地操練。一位令人注目嘅人物就係馬會董事利子厚會上陣參加上述三項賽事，佢平時熱愛馬術，對推進香港馬術比賽不遺餘力，有佢喺度，可以振奮香港馬術隊員嘅士氣。
馬術比賽有好多術語，全部係英文與歐洲語文，因香港參加馬術比賽人士，全部識英文，故此平時不注重中文。但奧運馬術比賽會在電視播出，唔可以全部英文台噃，點搞好？聽講主辦當局已經急忙繙譯咗一套馬術比賽中文詞彙，畀啲現場評述員使用，其實香港未必有足夠評述員嚟應付奧運馬術賽，後日嘅預賽亦可當為評述員練習賽。