喺香港上市已15年嘅中國海外發展（688）噚日搞生日酒會，請嚟唔少猛人，咁就睇到一間企業嘅江湖地位。港交所（388）主席夏佳理、局長馬時亨、基本法委員會副主任梁愛詩、有九倉（004）吳光正、做咗CVC基金顧問嘅梁伯韜、太古中國主席陳南祿、恒生（011）潘仲賢等都有到場。
長實李氏父子、新地三兄弟、華懋、恒基和信和等本地地產商，人唔到都要花牌到。而身兼中國海外非執董嘅李國寶因為出國嚟唔到，亦送上賀電，話好榮幸入咗佢哋嘅董事局云云。
中國海外主席孔慶平話，今年6月底止，佢哋嘅土地儲備超過1700萬平方米，計劃投資額1041億元，相信都夠四至五年用。過去15年，中國海外總資產由45億增至359億，增長逾7倍。噚日中海股價大升近一成，最高試過破17蚊㖭，收16.98，呢份先係最好嘅生日禮物。