好多英雄人物都有個死穴──怕老婆，搞到「怕老婆會發達」呢句說話街知巷聞。曼聯領隊費格遜畀人威嚴十足嘅感覺，點知返到屋企都係隻河東獅話晒事，真係講你到唔信！
話說曼聯周三兵分兩路去北愛同蘇格蘭打熱身賽，費格遜之前一晚點定幾支蠟燭，含情脈脈同老婆卡菲講聽日有比賽，點知老婆聽完隻眼反一反白講：「爛鬼熱身賽，聽日要搬屋你留低幫手，係咁喇！」跟手開燈走咗去，淨番費爵爺抱頭嘆氣。
幫手搬屋唔准帶隊
一向球隊至上嘅費爵爺知道單嘢實通天，於是自動同傳媒講番件事，仲輕描淡寫話老婆咁做消除自己好多煩惱，「因為我老竇打過格連杜蘭，我自己亦效力過鄧弗姆林。」言下之意，佢今次唔使帶隊打母會，真係要感激老婆大人喇！
講真，呢個世界冇話邊個怕邊個，有商有量先係好夫妻，所以費爵爺嘅解釋等同於掩飾！其實，費爵爺真係好愛天主教徒嘅卡菲，當年佢效力新教徒支持嘅格流，備受球迷歧視照捱過；估唔到40年過去對黃面婆真心如一，直頭值得表揚喇！
摩連奴幫妻買煙一絕
其實，球壇鐵漢怕老婆嘅又點止費爵爺呢？好似車仔招積領隊摩連奴就係例子。年前英國《太陽報》篤爆話，有一次摩連奴太太半夜煙癮大作，於是呢位葡萄牙佬嗱嗱臨踢對拖鞋，喺倫敦煙霧彌漫之下跑落街買煙仔慰妻。各位讀者，你話呢個畫面係反映男士冇尊嚴，定係風度翩翩呢？