我囗中文T

今季興SloganTee，當中口號講咩未必睇得明，但個個搶住着英文字上身，好似高人一等。不過，邊個話番文就係等於型啲先？最近華人潮界掀起中文字Tee熱潮，台灣台啤隊籃球員兼藝人陳建州（黑人）設計「態度」T-shirt喺台灣爆紅，近日仲殺到埋嚟香港正式開賣，就連本地茶餐廳龍頭翠華都自家出品「我愛翠華」系列Tee，中國人潮撐中文字Tee，行步路都抬頭挺胸啦！
記者：葉雪芯
攝影：周旭文、黃子偉
Model：Gigi、Mixson@puremodel

本土文化抬頭！早前星爺都同陳冠希合作推出「十分鐘搞檸掂」Tee，今次輪到本地茶餐廳大王翠華亦殺入潮流界，自家出產「翠華Tea完再Tee」，一共4款，包括「我愛翠華」、「我愛魚旦」、「我愛咖喱」、「我愛豬扒」，幾隻中文字，令人會心微笑。每款只賣一星期，夥計形容去貨情形為「快過坐火箭，極度唔夠賣」，前兩款一推出唔夠兩日就火速賣晒。每件Tee雖然只賣$38，但製作有誠意亦有創意，錫紙包裝袋加型爆Sticker，包裝袋上的Barcode貼紙詳細列明「款式」和「尺碼」，但全部變咗為「口味」和「份量」，最搞笑係多咗「成份」一欄──「100%創意，100%品味」，連細節都有齊晒，一啲都唔馬虎。𠵱家暫時只推出食物款式，但由於今次茶餐廳出Tee反應好熱烈，小記聽聞遲啲仲會出埋飲品系列，大家要密切留意！

■翠華企業化，最近香港仔新分店開張就整咗個「奀咕咕──翠華喺香港仔又多咗粒慈菇椗」廣告，條橋好得啫！

■「我愛翠華」係第一期推出的款式。（$38/a，售賣期已過）

■「魚旦」Tee是上期推出的款式，一推出就斷市。營運經理黃榮強細細聲同小記講，遲吓會再度推出，但日期未定！（$38/a，售賣期已過）

■錫紙包裝正到爆，件Tee只係賣$38，真係喺翠華食個茶餐都唔止。

香港有翠華，台灣有態度。由黑人所設計的「態度」Tee，自去年推出以來已賣出10多萬件。呢件Tee本來只係台灣台啤籃球隊隊員的球衣，籃球隊副領隊黑人（陳建州）話：「其實那只是我們去年SBL（台灣籃球聯賽）冠軍賽隊員上場的球衣，當時我們球員每個穿着大大隻字的「態度」字樣綠白T-shirt上陣，未想過會公開發售，更加想不到Tee會有爆紅的一天。」

■台灣藝人兼台啤籃球隊副領隊陳建州（黑人）為了要鼓勵隊員，設計了這件態度Tee，估唔到球衣變咗潮物。暫時只是推出了Tee和Cap，但之後還會推出飾物，例如Dog-tag。

■左手手袖上印有台啤隊的英文隊名。

■白底迷彩字SBL特別版態度Tee$249/b

■台啤隊07年終於奪得冠軍，推出了SBL2007冠軍金鑽限量版$319/b

■紅色、粉紅色、綠色態度MeshCap$199/b

呢件態度Tee，黑人有想表達的Message：「去年那場冠軍賽，我們『台啤』對『裕隆』，初賽時我們已經落後0-2，不能再輸。台啤以近乎『雜牌軍』的組合打入冠軍賽，沒有錢，沒有後台和資源，為了要鼓勵士氣，所以設計了這件Tee。」雖然比賽最後還是輸了，但球賽結束後第二天，有很多球迷打電話到台啤要求購買球衣，甚至在夜市都靜雞雞賣翻版，於是決定正式推出。不過由於「態度」Tee沒有申請專利，所以冒牌貨不斷湧現，某些夜市店舖推出態度「台客」版，就連謝長廷去年選市長都着同一字款的「長廷」版，難得黑人完全唔介意：「很高興大家都認同我這種想法，受歡迎才會有翻版。這樣說不是鼓勵翻版，不過真心的不介意。『態度』原本就是想表達『越困難越要堅持下去』，如果翻版可以讓更多人『挺』這種態度，又有甚麼所謂？」

■06年4月29日，台啤隊着晒態度Tee上陣。

除了黑人着住上節目，身邊好友如大S、小S、羅志祥、范瑋琪、黑澀會美眉、棒棒堂男孩、星光幫、郭富城、張栢芝等都着過，唔紅有鬼。

■小S、大S自己剪Tee自作業，又幾型。

■StartFromZero「由零開始」黑底白字Tee$220/c