中國移動（941）老總王建宙喺內地雜誌《環球企業家》撰寫文章，講佢今年初喺瑞士達沃斯出席世界經濟論壇時嘅逸事，又講到答應今年9月出席喺大連舉行嘅論壇首次成長性峯會年會。
華華好奇睇吓篇文，發覺文章除咗介紹呢個會議，原來王總非常心繫祖國同中移動，事關正當各人講互聯網演進下，全球正「谷歌化」（google-ization），人與人如何進入web2.0溝通，王總就不忙以全球最多手機用戶之一嘅流動電話營運商身份，話應該係手機化，因為越嚟越多人用手機上網。
佢仲話，中國喺世界經濟舞台角色漸重，今年係講中國需要一個點樣嘅世界，佢強烈感受到與會者對中國經濟發展嘅關注，所以下個月論壇嘅峯會年會，將首次走出瑞士，喺大連開會，期待中國可以喺論壇上發揮更大影響力咁話。