中國礦業（340）噚日召開新聞發佈會，但竟有近200名小股東出席，唔少係內地民企大老闆，真係卧虎藏龍。
中礦主席蔡原首先澄清早前廣州《南方都市報》一篇報道，強調中礦並冇涉及旗下附屬公司高標國際前股東嘅法律糾紛，而中礦旗下公司股份或資產，並冇受牽連而要凍結查封。中礦公告話已收到《南方都市報》澄清信件，表明報道與事實不符。
最精彩要數最後出場、持股量約達6.7%嘅超大（682）主席郭浩（3億股由超大持有，1億股私人持有），雖然持股量較大股東蔡原嘅8.44%略低，但發言時儼如中礦老闆，話知道邊個向《南方都市報》放料，呢個人香港身份證嘅名係鄧思，但喺大陸有另一個名。
超大郭浩扮老闆
跟住佢講期望中礦5至7年後，發展為市值過萬億嘅礦業股，年盈利能力350至400億元，股價上至60蚊。但提醒投資者，𠵱家市面好多所謂礦股股價亂升，過得兩三年後就見真章，交唔出現金流表現嘅，隨時打回原形。
郭主席仲教管理層請番兩個投資者關係總監，一個係分析員出身專做圖表；另一個負責對外溝通，吸引全球基金投資，咁先可以將中礦打造為萬億市值公司。