好多大隻佬都係得個樣，稍為惡死啲佢就開始縮，今季德甲超級球隊拜仁就可能係呢隻虧佬格。佢哋周一德國盃首圈對打法硬淨嘅丙組隊貝豪森，加時後都只打和1:1，最後多得老將簡尼撲出12碼先晉級，其餘球隊知點對付拜仁喇？
德盃靠互射12碼晉級
拜仁之前輕取雲達不來梅、史特加、史浩克04奪得德聯盃，外界一致覺得佢哋國內肯定無敵！不過，拜仁喺德國盃對住丙組隊貝豪森先落後一球下由高路斯追平，最後互射12碼階段，全靠老將簡尼撲出兩個12碼，先取得晉級權。
呢場波拜仁除咗意大利射手東尼外，列貝利、高路斯同薛羅拔圖等新加盟球星全部上陣，加埋雲邦美、舒韋恩史廸加等原有主力，賽前估贏波應該易過食生菜；點知貝豪森球員冇怯場，腳腳七注，踢到班拜仁球星周身瘀傷，冇啖好食。嚟緊聯賽揭幕戰對手羅斯托克，睇怕都會有樣學樣，到時拜仁實有排受！
拒認簽13歲秘魯天才
拜仁食軟唔食硬，估唔到球隊總經理漢尼斯都係敢做唔敢認嘅人。話說拜仁近日邀請13歲秘魯天才比爾加盟，點知漢尼斯死口唔認雙方簽咗約，話只係請對方接受青年軍訓練，一年後先決定係咪簽實，不過，秘魯國內就話呢位天才已簽約落實加盟。
其實，呢位比爾仲有個同齡好拍檔叫伊利亞斯，前者有馬勒當拿之稱，後者有簡尼基亞之稱；我求大俠勸漢尼斯大方啲，盡快簽埋伊利亞斯番嚟，如果第日蘇州過後冇艇搭，先嚟後悔就無謂喇！