之前整咗套全電腦動畫《忍者龜》嘅意馬（585）又有新搞作，佢哋同南華工業（413）旗下公司華盛玩具達成協議，華盛會幫嚟緊兩套電腦動畫電影《神勇飛鷹俠》同《小飛俠》製作生產玩具。佢哋話，所有玩具都會同兩套電影一樣，同步喺09年付運兼有得賣。
雙方設計師拍住上
好耐冇玩過傳統玩具嘅華華，唔知華盛做過乜嘢玩具，同埋做玩具有幾叻，但根據意馬新聞稿話，由於佢哋兩間公司同係位於柴灣區，所以意馬嘅美術家同動畫師，會跟華盛嘅玩具設計師同工程師一齊做玩具，咁樣效果會好啲喎！意馬本06/07年報已用咗呢兩齣動畫嘅人物嚟做封面㖭。
華華睇過《忍者龜》，覺得畫質都唔差，對已成為好多人心目中經典嘅《神勇飛鷹俠》同《小飛俠》都有啲期待。華華雖然唔知《忍者龜》嘅玩具賣得好唔好，但都希望嚟緊呢批可以再下一城啦！