美國股市因次按債券困擾，不斷下跌。沙田陳師奶間中有炒吓股票，不過自從以六元八角賣清隻688（中國海外）之後，見到688係咁升，自己唔敢再追，最高升到十七個七，為之氣頂，已經唔玩。最近見到市場好似坐過山車，上下波幅六百點，報紙話係美國次按債券市場不穩所致，於是走嚟問左丁山：「唔該以最簡單語言，解釋畀我聽何謂次按債券？」
諗咗一輪，唯有咁樣答。香港有優惠利率PrimeRate，銀行有優越客戶（PrimeCustomers），Prime就係好、正、一級咁解。現在講嘅次按，就係sub-primemortgage，香港人人都知道乜嘢叫做按揭，sub-prime相等於belowprime，即係冇咁靚，冇咁正，差一皮，比prime低一級，中文報紙故此譯做次級按揭，簡稱次按。
次按唔等於二按（即香港嘅二按），而係指借錢嘅按揭客戶嘅信貸評分甚低，包括低收入，職位不穩定，每月供款還錢未必百分之一百肯定之人所借嘅按揭。因最近幾年美國經濟好，失業率低（4.5%），房地產價格上升，銀行水浸，於是拚命借錢出去，連次級客戶嘅按揭都闔埋隻眼，照借可也。最為離譜嘅，就係有一啲叫做Ninja貸款。（借款人NoIncome，Nojob，Noassets冇收入，冇工做，冇資產，仍然可以借到按揭。）
因市場流動性（liquidity）過剩，唔少貸款機構亂咁做次級按揭，做完就將所有按揭打包（package），成為不同級數嘅按揭抵押債券（Mortgage-backedbonds），向市場發售，經級評機構（標準普爾，穆廸等等）評級之後，由對沖基金，退休基金，甚至散戶等會以不同價錢買入，作收息之用。一級按揭債券嘅業息率當然比次級按揭債券低一啲。金融機構將按揭貸款以債券形式賣晒，消除咗信貸風險之後，仲有費用可收，好好賺。誰知好景不常，當供款人冇錢供樓，變成賴債（default），全世界啲按揭債券就莫講還唔到本，連息口都畀唔起。消息一出，呢類債券嘅價格就會插水，投資者無法走避，損失慘重，所以貝爾斯登嘅CFO話目前市況之慘烈，係佢二十二年來未見過嘅。