曾幾何時，Fusion菜在飲食界都hit過吓，只係近幾年唔知搞咩鬼開始名氣下滑！正以為fusion已死的時候，兩個多星期前卻俾我發現銅鑼灣出現了一間主打fusion菜的餐廳，以傳統泰菜「溝」意大利菜；餐廳夜晚更會變身成為高檔酒吧，全店有3部LCD大電視直播「now」足球賽事，正值「英超」開鑼，食完dinner再睇波飲酒直落，一於咁話。
記者：甘露露 攝影：陳細權
Model：Joey&King
泰國菜以味濃香辣出名，同崇尚自然簡單的意大利菜可謂格格不入，但新開兩個多星期嘅SeacoastBar老闆Paco偏偏要將兩者crossover，問佢點解唔揀中西合璧呢？答案係：「中西合璧咪變咗茶餐廳！」又係喎。
意泰Fusion不失地道
Paco話絕對唔會為fusion而離經叛道，因此菜式創新得來又保持地道風味，這裏聘請了3個泰國師傅和4個西菜師傅，每位師傅都曾在大型飲食集團任職，有十多年經驗，可說陣容強勁呢！
此外，所有泰式香料食材，都是泰國來的飛機貨，香茅、椰菜苗等更是每日空運來的呢！
啱斯文客睇波
這裏晚上變身酒吧，不過，是斯文吧，沒有骰盅、拳手、LiveBand，絕不嘈喧巴閉。但就一樣有酒劈，有電視睇直播波，因為Paco想為一班「斯文客」，提供一個舒服又較靜的地方食飯睇波飲番杯。
「我特登唔開喺後面街鬧區，因為知道有啲客人鍾意靜靜哋咁睇波，所以裝修亦以簡約自然為主，我哋呢度唔可以玩骰盅猜拳。至於酒類，除咗Cocktail，仲有法國紅、白HouseWine，啱晒鍾意摸住酒杯底傾偈嘅朋友。」愛熱鬧，這裏絕非你那杯茶；相反，想同女朋友甜蜜蜜飲酒睇波，這裏會是較適合的選擇。
牛柳半熟波蛋釀鵝肝 $108
波波形半生熟的雞蛋內是煎香的法國Rougie鵝肝，入口與溏心蛋漿溶為一體，配搭絕妙。澳洲牛柳味濃多汁，配燒汁更惹味，薯茸混有甘笋茸，更香甜軟滑。
蛋咖喱炒蟹 $138
加了雞蛋和7種泰國香料煮的泰式蛋咖喱，比一般咖喱更滑，入口有香料味而不太辣，只以少許泰式辣油吊味，口味較港式。肉蟹隻隻都有一斤多重，啖啖肉，香辣得來仍可食得出蟹的鮮甜。
泰式軟殼蟹沙律 $78
軟殼蟹用傳統的泰式炸，入口比一般香脆唔會油淋淋，有濃香的泰式香料味。醬汁是芥辣和醋調製的西式汁，味道配搭令人意想不到。
泰式香茅大蝦 $138
手掌般大的虎蝦煎香再插入新鮮香茅焗，香茅味滲入蝦肉內，吃時蘸些泰式酸子汁，汁內混入了泰式香料，味道酸酸甜甜，將蝦肉的鮮甜味提升。大蝦下墊有軟綿綿的茄子肉，啖啖都透着蝦的精華。
泰式蝦餅沙律 $68
新鮮海蝦加入多種泰式香料，人手打製而成的蝦餅，外脆內爽，配意大利雜菜沙律；沙律菜用意大利醋和橄欖油做dressing，正好是炸蝦餅的減膩良方。
啜住Cocktail煲英超
StrawberryDaiquiri $48
用冧酒、檸檬汁、梳打水、士多啤梨糖漿打成，酒味不太重，有很香的士多啤梨味，開正女仔口味。
AroundTheWorld $48
男仔鍾意飲掯啲，不妨試這杯用Gin酒、威士忌、白蘭地、冧酒、伏特加、菠蘿汁、橙汁調校的Cocktail。
SeacoastBar（28383751）
地址：銅鑼灣告士打道269號地下
營業時間：11:00am-12:00mn
（有足球直播當晚，營業時間會延長）
座位：60個
交通：銅鑼灣地鐵站D1出口
人均消費：$130
付款方法：晚市設加一，信用卡及現金
