港股噚日先升後跌，但就跌少咗，係咁易跌30點唔夠，令網友重燃信心，CJ133話：「𠵱家成街平貨，執到手軟、執到笑呀，大家好趁低入貨。」
不過，好多網友認為仲未係入市時候，神通棍就指：「今日入市，聽日隨時全手變蟹貨。」Dennis0307話：「家吓成街蕉皮，隨時跣死！」Anakin仲嚇佢：「買着蟹貨，慢慢陰亁你。」
賺少啲好過坐艇
我叫豬豬講：「家陣低位未算低，係咪入貨好時機冇人知，只係知上個禮拜話好嘅人，買咗貨今日都喊餐懵。」Sagaice好同意：「睇定啲先喇，賺少啲冇乜所謂。」
要發達呀就認為：「就算入市都要睇定啲，只宜細注，分幾次入，咁會安全啲，不過咁嘅市，EQ少啲都頂唔順。」Jovovelaw相信：「用平均法增持平貨，個市突然反彈都可以搭到車，賺番筆。」
用平均法持平貨
狗籠紙業就對入市態度審慎：「家吓已經輸咗好多，仲話想撈底，咪搞啦！除非恒指跌到250天平均線喇。」飛眼提醒：「股災洪水無眼㗎！隨時可能同鐵達尼號一齊沉落2萬點，一切歸於平靜！」
http://www18.discuss.com.hk/viewthread.php?tid=4933857
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]