Car通:LotusEuropaS<br>宋芝齡東張西望盼蓮花

Car通:LotusEuropaS
宋芝齡東張西望盼蓮花

提起宋芝齡Angel,第一時間諗起佢識韓文,專同韓星做訪問。年前韓流襲港,Angel即時熱到不得了,大小節目都有佢身影。採訪前問佢有無DreamCar,佢第一時間答:「Lotus!我好鍾意Lotus㗎!」拍攝當日,佢一入Lotus個Showroom就不停「東張西望」、左摸右摸,興奮莫名,名副其實小粉絲;笑着摸住蓮花呢一刻,Angel好可愛!

記者:梁美甜
攝影:陳偉強
Makeup&Hair:William&Davina@BeautyTech

驚喜 蓮花簡約美

Angel未坐過Lotus之前,就覺得Lotus外形細得嚟敏捷又跑得,線條又靚,最啱嬌滴滴嘅女仔揸,但又怕跑車款設備按鈕多太複雜,點知今日由灣仔ShowRoom坐入數碼港呢轉令佢完全改觀。「我好Surprise呢部跑車入面裝置原來好簡單,幾粒掣就可以控制晒HiFi冷氣,好正!」Angel猶如小朋友分享大發現一般興奮地說個不停,「我本身就鍾意簡約多啲,見到佢內櫳比想像中簡潔,而且外形線條仲咁靚,𠵱家就更加鍾意佢㖭!」四個字講晒,「靚得簡約」就係Angel對事嘅要求,Lotus完全符合晒佢嘅要求啦!

■外觀上,EuropaS比EliseS2低調,線條簡潔流暢,行政感覺強咗好多。

■儀錶板無咩大轉變,但望到部車可以去到260km/h就好有衝動試吓係咪真係咁勁!

■我同Angel對住Lotus,第一次上車嗰陣都遇到一個問題,就係唔識開門,不過佢叻,第二次已經摸到竅門!

■跑車跑緊時副引擎熱到暈,必備通風口散熱。

荊途 克服到跑得靜

Angel自言Lotus車仔細細,似足玩具車,加上車身扁而細,行香港呢啲凹凸不平馬路應該會震得好犀利,點知兜完一轉返嚟,Angel又再次為Lotus改觀,「我仲以為會震到暈,點知部車不知幾定幾穩,仲好靜㖭!」我知,事關EuropaS嘅懸掛同之前Lotus好似Elise咁好唔同,新車吸震Damping柔化令避震能力提升不少;抓地力亦相應提高唔少,所以無再咁「登」囉!內櫳真皮桶椅亦幫咗唔少,因為EuropaS嘅座椅軟墊加厚咗,加上係桶形跑椅,「包」得晒成個人,自然坐得舒服啦!我最欣賞反而係部車夠輕身,唔到1,000kg再加埋個Kit包個UpgradeEngine同通窿Brake碟,令部車馬匹由200匹提升至225匹兼反應靈敏好多,隨時拍得住林寶堅尼呢類超跑!

■第一次坐DreamCar,仲要跑幾轉,Angel開心到不得了。

■換軟皮桶椅之後,大家坐Lotus唔會再好似以前坐Elise咁硬邦邦!

■Angel愛Lotus其中一個原因就係貪其內櫳簡約有品味。

經驗 主持本色問不停

Angel做慣主持,訪問嘉賓都習慣性會追問,所以一發現有咩地方新奇古怪就問個不停,好似話點解個Brake碟會「穿」窿、點解個門檻會咁高咁闊等等;坦白講,Angel問中我心底想要問嘅問題。坐過Lotus嘅人都知道上落車絕對係一門學問,因為車身低而扁,門檻高而闊,因此上落車都非常有難度,連Angel都話:「我要學坐!」梗係啦,Angel一心要擁有一部Lotus,所以學定點樣上落都啱嘅!其實EuropaS門檻高度已經降低咗少少,大約14mm左右,比Elise同EliseS好好多,不過對我嚟講依然辛苦到暈,上落車超難,若然着裙嘅話就一定春光乍洩囉!

■跑車尾箱一向不大,EuropaS嘅尾箱算OK,起碼可以放個HandCarry嘅篋吖嘛!

■Angel發揮主持本色,見到個通窿碟,即刻問點解,求知慾非常高。

■求知慾強嘅Angel覺得門檻又高又闊,即時問個明白。

LotusEuropaS規格

引擎:1,998c.c.直4
馬力:200ps/5,400rpm
扭力:282Nm/5,000rpm
傳動:6前速手動
驅動:中置引擎,後輪驅動
0-100km/h:5秒9
查詢:RichburgLotus(28770810)

後記:一個開心電話

完成訪問同試車之後,傍晚時分電話響,看看來電,原來係Angel,傳嚟嘅係開心嘅聲線:「我今日真係好開心,好多謝你幫我搵到MyDreamCar,唔該晒!」其實要講唔該嗰個應該係我,得你咁合作兼唔怕日曬雨淋笑住任勞任怨任影相,嗰一刻,我都覺得好開心!原來快樂係可以感染㗎!

話你知:升級版EuropaS

EuropaS原廠馬力都有成200匹,已經好犀利,代理仲加個Kit,Upgrade副引擎去到225匹,原先由0-100km/h要5秒9,𠵱家就5秒鐘就已經去到100km/h,你都咪話唔勁。升級版仲用咗通窿Brake碟,令跑車散熱快之餘,個Brake都耐用啲,反應快啲好啲啦!內櫳亦升埋級,用高級料同色皮,成部車Sharp醒晒,最抵死嘅係升咗級個價依然無變,你話筍唔筍?