喺7月12日，華華曾經為股市做過預警，話鄭少秋套《榮歸》7月18日會喺亞視首播，叫大家唔好睇小「秋官效應亞視版」嘅威力。恒生指數雖然喺首播後越升越有，仲要喺7月24日創新高，但勢估唔到形勢可以逆轉得咁快，家吓恒指倒跌至21907點，跌咗成4.09%！
唔知大家仲記唔記得7月27日港股暴跌640點，市場大多數話，暴跌嘅主要原因係日圓套息交易出現拆倉潮，但有追開《榮歸》嘅讀者可能會有另一個答案，就係套劇喺嗰段時間，咁啱就講緊97年股災！有陣時呢個世界嘅嘢，就係咁剛剛撞正啱啱！
結局去得盡
今個禮拜又點睇呢？咁華華喺呢度就有一個好消息，同埋一個壞消息，要話畀大家聽。好消息係《榮歸》就嚟播完，若果大家信嘅話，啲貨壓住晒嘅股民，有望可以喺下個禮拜出生天，因為每日播個半鐘嘅《榮歸》，將會喺今個禮拜五大結局！
咁壞消息呢？就係秋官喺《榮歸》入面飾演嘅香港首富李國凱，今個禮首先被發現患上血癌，跟住會喺今晚俾人綁架，到聽日仲要中彈㖭！個編劇真係去得好盡，慌死個市死唔去，再踩多兩腳！
華華雖然唔肯定首富最後嘅命運係點，但從電台劇情預告最尾嗰句「全家人在北京的公寓和睦地吃團圓飯」嚟睇，李首富應該係過到97嘅。通常，若果秋官套劇係happyending嘅話，播完之後，個市都會彈番上嚟，唔知今次得唔得呢？
又傳重播《大時代》
不過華華都仲有啲隱憂，有路邊社傳聞話，TVB收費電視台會重播《大時代》，華華即刻打去該台熱線查證，但對方冇正面回應，只係話冇收到呢個消息，跟住話呢期興劉松仁，所以會播劉松仁嘅劇喎。弊喇，劉松仁都有份做《大時代》㗎喎，咁即係點呀？
[email protected]