我車報員有個朋友成日喺度問同一個問題，就係話全新第10代ToyotaCorolla，究竟幾時先至會嚟到香港?話等到頸都長喎；唉，淨係你係咁咩，好多想買部1.5公升家庭房車嘅朋友，咪又係咁諗……
不過，呢條困擾咗好耐嘅問題終於有答案，事關代理方面日前終於宣佈全新第10代Corolla將會喺9月尾正式登場；據知，香港版本嘅外觀同日本現時賣緊嘅一款唔同，唔單止年輕兼且流線型，望落仲有些少似Camry㖭！車廂方面，除咗有皮椅、恒溫冷氣、投射錶板之外，後座仲破天荒地採用平地台設計同埋有8個安全氣袋，從而令乘客可以坐得舒服之餘兼有更佳保障。
至於動力配搭，新車並唔係好似坊間所傳嘅1.8公升引擎，而係沿用1.5公升型號，並注入VVT-i技術，馬力同扭力輸出分別係109ps/6,000rpm及14.3kgm/4,200rpm，配埋4前速自動波，性能表現唔差㗎！新車預售價$149,900起，睇嚟朋友都會好快咁去Showroom訂車囉！
記者：車報員