坦白講，我絕對係砌積木嘅初哥，雖則細個玩過吓，但係要砌啲多機關同埋可以郁動嘅模型車就一啲都唔容易，同幾位發燒友幾輪「交鋒」之後，又真係有少少心動，想砌番架車仔嚟玩吓，尤其係蝙蝠車同郁得嘅機關車仔，初哥如我又可以點樣做呢？
記者：梁美甜
攝影：伍慶泉
入門車仔
「其實想砌啲郁得又經典嘅辣車都可以，不過就會細部啲，符合番人仔比例嘅車，好似呢部蝙蝠車咁嘞！」Paul細心解釋畀我知，喺佢解釋緊嘅時候，查實我已經玩緊部車，仲好唔覺意咁射咗個蝙蝠飛彈落攝影師度㖭，認真唔好意思！「除咗飛彈之外，連盒仲有另一部由雙臉人挾持銀行解款車，車身仲有個暗格收埋武器。雖然多郁動組件，但係部車細，組件少兼簡單，最啱入門嘅人玩。」即係講緊我啦，Paul只笑不語，明晒！
由細砌大
「我覺得砌模型最好由細同簡單啲嘅模型入手，掌握到竅門之後，再砌一啲大型複雜多組件嘅模型就易啲喇！」Paul認真地教我，「好似呢啲City系列比例相約嘅模型，就算係經典蝙蝠車都好，都會好容易砌掂，因此每個組件都大大件又易認，一個鐘頭左右就砌完，你會覺得好有滿足感，而且自信心仲即刻番晒嚟，之後再砌其他模型就得心應手好多。」我信，如果唔係阿Paul都砌唔到法拉利、MobileCrane嗰類高難度大車啦！
查詢：磚門店
81055998
TheBatmobileTM：Two-Face'sEscape
系列：BATMAN（編號：7781）
特色：車長約24cm，394片積木，一套包蝙蝠車、銀行運款車及路障同兩個人仔（蝙蝠俠同雙臉人），隨盒仲有蝙蝠俠系列小玩意。