亞視受慣性收視影響，長期唔夠無綫打，近年亞視只係製作資訊節目，之前陳啓泰同亞洲先生翟鋒等主持嘅《第一手真相》，內容以揭露社會真面目，同埋發掘新鮮事物為主，收視約有6點，即有約39萬觀眾欣賞，但至6月底播咗150集忽然停播，以日本卡通《蠟筆小新》頂替，不過下周一起，夜晚10點又做番《第一手真相》，《蠟》片就會腰斬，要到10月嘅周末先復播。
噚日有網友「閒＿人」喺香港高登討論區（ http://forum.hkgolden.com/view.asp?page=3&message=993433）發帖抗議亞視下周起停播《蠟筆小新》，並呼籲網友簽名支持，結果有超過100名網友聲援。
儲夠料復出
亞視高級副總裁葉家寶噚日喺電話度講：「其實都係節目調動，一早都講過《第》節目係中段休息，只係因為製作上要儲吓料，呢排都有好多觀眾send咗片段嚟，所以咪捲土重來。」
葉家寶續說：「呢個節目好能夠反映巿民心聲，況且收視狀況，《蠟》片都只係得3點（約19萬觀眾），換番《第》節目對收視有幫助。」《第》節目主持陳啓泰則話：「節目更改總有反對聲音，我認為《第》節目成本唔貴，但外間反應係唔錯嘅。」
聲援《蠟筆小新》網址：
http://forum.hkgolden.com/view.asp?page=3&message=993433
