澳洲有一名九歲「球星」叫做RhainDavis，腳法驚人，在球場上過關斬將，好似馬勒當拿，於是祖父將佢嘅表現拍成video，寄去曼聯，同時送上YouTube，已有三百萬人在互聯網上睇過。曼聯一睇，立即邀請阿Rhain加入曼聯青訓學院，成為《太陽報》體育版頭條新聞。現時車路士嘅明星球員祖高爾（其實有時表現麻麻，與卡卡相差兩皮）年幼時亦係光芒四射嘅，十六歲之時，曼聯就想以一千萬鎊從韋斯咸買咗佢。呢位阿Rhain會唔會成為祖高爾，甚至卡卡呢？
小時了了，大未必佳，九歲好難定二十，神童球員能夠成為足球明星嘅，十中無一，未到十六歲，都唔敢話一個足球小將有無真正前途。中國曾經派一隊精英少年球員去巴西受訓，咪又係咁，呢班少年回國之後對中國足球隊，毫無貢獻。
一位讀者W來電郵話佢認同本欄對伊拉克奪得亞洲盃嘅見解，並且嘆息：「莫非黑錢、假波等問題已經把中國足運侵蝕，只餘軀殼，或球員比賽時，靈魂與黑錢同時放在銀行保險箱內？」中國球員表現之差，令人費解，左丁山唔從黑錢等陰謀論出發，只係覺得中國球員唔夠專業體育精神，態度有問題，佢哋平時練波或者唔夠刻苦，唔注重體能訓練，忽視科學方法，所以同南韓、日本球員相比，明顯唔夠速度、唔夠硬淨、打衝撞波輸晒，打幼細波就欠組織、守不穩、攻不銳，你話點會贏波。」
中國球員嘅attitude，好多時未夠成熟。例如易建聯好似好有潛質，七呎高，能射三分球，又可以灌籃，假如去美國捱吓苦，練好體能，有資格成為華人奴域斯基（達拉斯小牛隊主將）。可惜吖，易先生未成名就有脾氣，公鹿隊選秀選中佢，佢竟然唔肯去報到，係要扭計，想加入華裔居民多嘅城市，例如金州勇士，侯斯頓，紐約，諸如此類。此乃不成熟之表現，毫無專業態度。易先生如遵守NBA遊戲規則，到公鹿隊捱苦兩三年，打出名堂，以自由身（freeagent）身份轉會，叫價一億美元都得啦，你估留在中國，明年會更好波乎？