喺90年代令男人見到都有噴血感覺嘅波霸葉子楣，當年憑住36F上圍，配以20吋小蠻腰名噪一時。因為上圍同腰圍形成強烈對比，加上葉子楣好會利用自己身材嘅優點大擺甫士，每次亮相都例必引起誰「乳」爭鋒嘅情況。
自從葉子楣同骨科醫生呂錫照拍拖後，佢開始退出娛圈，深居簡出，絕迹幕前同公開場合，可能因為唔使曝光嘅關係，佢對自己嘅儀容要求驟降，偶爾俾記者影到相，佢嘅衣着打扮都顯得好師奶，當年嘅葫蘆身形變咗水桶腰。
仲未結婚
噚日下午約一點，揸平治座駕嘅葉子楣現身養和醫院，做柴可夫嘅佢雖然戴住副太陽鏡，但星味就大不如前，從前豐滿嘅身形忽然大縮水，其間佢一直留喺司機位睇住架車，等咗一陣，一個穿着紅色外套、腳部受傷撐枴杖、貌似呂錫照嘅中年男子，喺一名外籍男子攙扶下由醫院行出嚟，佢慢步行去葉子楣架車，兩名男子坐後座，葉子楣就開車離開。
葉子楣早前傳出同拍拖15年嘅醫生男友低調結咗婚，不過舊年佢亮相國慶煙花酒會時就話𠵱家喺澳門做牆紙同飲食生意，但同男友仲係拖友關係，未做呂太喎。
