魯連城打骰嘅蒙古能源（276），由cyber基地轉型到大漠草原，唔經唔覺都8個幾月，雖然魯連城成日話響蒙古真係買到寶唔係齋吹水，但始終口講無憑，個礦掘到煤先係好嘢。
蒙能嘅法務總監高朗就話，佢哋買嘅嗰個科布多礦區的確貨真價實，嗰3億噸煤10月左右就掘到出嚟，咁睇番公司個股價，年初只得包機業務嗰陣，0.27元就真係只得0.27元，𠵱家六個幾係有三分二個香港咁大的礦區，絕對係「打真軍」。
帶記者去蒙古考察
為咗證明公司唔係齋炒煤概念，下個星期佢就會去歐美路演見吓投資者，下個月佢就會帶記者去蒙古實地考察，到時除咗睇煤礦，仲會俾大家試埋佢哋啲私人包機服務……即係咁，親眼睇過至為實，但大鑼大鼓兼夾出埋私家隊，「流」嘅程度係咪應該好低呢？