地球先生的確就嚟頂唔順，夏天天氣一日熱過一日，空氣、海水冇樣健全。環保分子極力推廣，大家幾唔關心都好，都係時候出番點力。各大品牌近年突然清醒，推出不少以環保作主題的產品，環保袋、有機棉，有Gimmick又有號召力。無論品牌當宣傳又好，為環保出點綿力又好，有機棉始終純屬天然，即使係欠缺環保意識的瘋狂購物者，買件有機棉亦會有同大自然拉近的感覺，又何樂而不為呢？
記者：許維雅
攝影：陳陶鈞
Model：Meeco
H&M有機系列狂增36倍
H&M憑着平價潮流衣飾，俘虜不少女生的心，生意穩定，自然係時候做點事情回饋社會，亦同時可兼顧着重環保的人客，一舉兩得。年頭在港開店除以娜姐作號召之外，其次就是用了有機棉（OrganicCotton）系列作為賣點。H&M為了增加全球市場對有機棉的需求，不定期推出的有機棉系列卻成為今個秋季的主打，大量設計及生產有機棉系列，使用冇採用有害化學品種植的棉花。06年有機棉的使用量為30噸，估計今年會增至1,100噸，大幅狂增36倍，可見環保商業的確係大勢所趨。
有機棉女裝玩長身TunicTop
不少品牌推出有機棉系列都以Tee為主，今季H&M女裝同樣出Tee，不過全部都係長身的TunicTop款式，顏色以白和灰為主，配合不同搶眼大Print，十分吸引。可見環保之餘，亦要緊貼潮流，先能令人客支持環保同時買得心頭好。其次就有一些連身裙、中袖鮮粉紅Top，秋季味較濃款式，同樣吸引，只可惜香港30幾度的高溫，想着都仲要等一段時間。
男裝有機棉厚身秋裝
全灰色主打的男裝系列反而款式選擇較多，衞衣、外套、恤衫通通有齊，梗大玩格仔圖案，唯獨係全部十分厚身，屬真正秋季貨款，買咗都要等吓先有得着。
H&M（21109546）
中環皇后大道中68號地下
OXBOW 法國浪牌玩天然
提到滑水滑浪品牌，亞洲區市場似乎已被澳洲Quiksliver雄霸，有25年歷史的法國品牌OXBOW今日才正式於香港開設全亞洲首間專門店，總經理EricBonnem仍充滿信心：「全球5大水上運動品牌，OXBOW係唯一歐洲出品，加上我哋賣點係滑浪，主題係Natural，玩嘅係LongBoard。而其他品牌係Urban，玩嘅係ShortBoard，大家個Theme都唔同。」話明品牌係大自然作主題，品牌除了有機棉系列外，更有天然海藻製的產品。難怪Eric都認為環保、有機棉概念係大勢所趨。有機系列現時只佔品牌20%左右，Eric不諱言希望將來會變為100%。
OXBOW（31076027）
尖沙嘴海港城海運大廈2樓265號舖