一直都覺得興趣同工作都好難同時兼顧，有興趣嘅工作未必賺錢，賺到錢嘅工又未必係自己興趣；所以好羨慕嗰啲可以寓興趣於工作嘅人，就好似Pauline咁，自細愛砌積木，到開店賣積木，開工又得閒時又可隨心意砌自己鍾意嘅積木模型，呢種生活夫復何求？
記者：梁美甜
攝影：伍慶泉
查詢：磚門店（81055998）
砌出事業
Pauline自細愛砌，砌親都係辣嘢，即係唔高難度唔具挑戰性嘅唔揀，點解？因為已經係高手囉！我講緊嘅係砌積木喎。「𠵱家砌嘅除咗係Technique多啲之外，都係一啲經典又或者絕版積木模型。」咁又係，做埋老闆，自己揀咩嚟砌都得啦！好似呢部蝙蝠車咁喇，雖則唔係絕版，但就一定係經典嘅款式，「砌LEGO有番咁上下年資嘅人，都會砌番一兩架經典車，好似法拉利又或者呢部蝙蝠車咁。」
講真，呢部蝙蝠車好像真，最搞鬼嘅就係車尾個渦輪引擎，係可以「噴」出嚟㗎！「呢啲郁得嘅部份亦係模型最難砌嘅組件，尤其係加埋啲齒輪仲論盡，好容易砌錯兼唔郁㗎！」我都知，不過就算話難都好，Pauline咪又係3、4個鐘頭就搞掂，始終都係高手點砌都得！
TheBatmobileTM：UltimateColletctor'sEdition
系列：BATMAN（編號：7784）
特色：與真蝙蝠車比例約1:10，車長約45cm，1,045片積木，有可動渦輪引擎及推進器連火燄，可揭頂見室內組件。