樓市好，從地產經紀嘅佣金表現可見。據世紀21行政總裁吳啓民話，今年上半年佢哋嘅經紀佣金收入增長達40%，主要因為樓市好，樓價又升，加上佢哋分行數目增加所致；全年可望維持呢個高速增幅。
佢哋嘅加盟店分行數目，亦會加速發展，上半年已加多10數家至130家，喺下半年再增加多50家，至180家。噚日，世紀21仲聯同大新銀行（2356），為呢班加盟店創業家提供融資。
大新銀行執行董事藍章華介紹新推出嘅世紀21創業錢貸款計劃，話可以為有興趣作為世紀21加盟店嘅人士，提供最高達30萬元的無抵押貸款，還款期可長達18個月；大新銀行主要視乎貸款者嘅工作經驗、財務狀況、信貸評級作審核考慮。