一向甚注重內部培訓嘅滙豐控股（005），甚少喺外邊招兵買馬（唔計投資銀行部門嘅人，因為行內向來互相挖角），但呢個企業文化，正在悄然改變，而且越嚟越注重市場推廣。滙豐噚日宣佈，設立「環球個人理財業務兼市場部主管」新職位，並委任曾卓基（AlexHungate）由9月起擔任。
喺滙豐長大嘅銀行家，一向都係熟悉商業銀行運作多過市場推廣，因此，要搞市場推廣，只能向外招手，曾卓基加盟滙豐前，係路透社亞洲區董事總經理，之前亦曾擔任市場推廣主管，佢喺牛津經濟學系同商業管理系畢業，攞埋個哈佛工商管理碩士，睇學歷已夠勁。
難道潮流興姓曾
曾卓基日後駐倫敦，並要向集團行政總裁紀勤滙報，又會擔任集團常務董事，並加入由10多名成員組成嘅集團管理委員會，可見佢呢個職位幾咁重要！
順帶一提，曾卓基嘅英文名AlexHungate，從英語嘅角度出發，好難令人聯想到佢嘅姓氏係「曾」。難道行政長官曾蔭權成功連任後，潮流也興姓「曾」？