理文造紙（2314）去越南發展紙漿市場，大搞木漿、箱板紙廠，又會起電廠同碼頭，實行自給自足，咁大個項目自然要請小記去了解下，但記者點問行政總裁李文俊，佢都唔肯透露總投資額，只肯講首期投資約16億港元。點知噚日喺當地後江廠房舉行奠基儀式，李文俊喺佢份演詞度爆響口，話會投資成12億美金，到越南副總理阮生雄講話時仲厲害，話阿文俊哥同佢講，第時會將投資加碼到17億美金（即係132.6億港紙）。
GDP增幅吸引過中國
轉個頭副總理仲話，越南喺2010年前，GDP按年增長目標為9%；2010年後則升到10%，比中國嘅GDP估計增幅仲高，唔怪得越嚟越多上市公司去嗰邊投資。
同場加映，一行十幾廿人嘅香港青年工業家協會代表去當地考察，據了解，係因為中國早前推出來料加工新政策，廠商入口相關貨品時要畀五成保證金，所以𠵱家要搵定海外發展機會。香港政府唔係睇唔到呢啲環境，又睇吓會點樣幫啲港商。