自滙控邵銘高去咗袋鼠國，恒生銀行董事長職位懸空兩個月，噚日終於搵到繼任人，由錢果豐出任董事長兼獨立非執行董事；滙豐銀行行政總裁霍嘉治，則做非執行董事，噚日起生效。
錢果豐每年可以攞到23萬董事長袍金，霍嘉治則有15萬。
打破利蛇以來慣例
恒生董事長一職，自從利國偉退休後，一直由滙豐管理層兼任，今次係破天荒，唔係滙豐嘅人。
市場人士估計，副董事長兼行政總裁柯清輝，會喺管理銀行上擁有更大嘅自由度咁話。
外界人士亦認為，新委任配合恒生高度自治，同埋滙豐銀行喺香港互相比拼嘅企管概念，加上恒生早前以24億向滙豐銀行買入50%恒生人壽股權，同屬滙控嘅兩家銀行，喺本港嘅前線商業運作，真係漸見分野，兩間行可以互相比拼一番。