的士從南灣出來，司機邊開車邊評論皇后碼頭的年青人，「搞咁多做乜呀，搵份工好過啦。」
我難免感觸，社會價值觀功利刻薄傾斜太久，對游手好閒的中青年始終脫不下有色眼鏡。搵食大過天，𢱑銀叻代表精英，無銀𢱑一族，額頭被鑿了隱形字樣：爛泥。有工唔做，搞搞震無幫襯，博拉上鏡，班後生，真係養唔熟。
連特首也反覆重申怪叫「我要做好呢份工」，打份工，儼然人生最大功能與成就。相反，冇工開，九成係社會敗類與渣滓。港女揀對象，也是首重經濟基礎，無業或者待業的，除非天生是女人湯圓，否則無女問津。假如傳媒落井下石，大可以調查一下，有冇女人支持另一半在皇后碼頭上蓋跟鹹風同眠。主流價值就像推土機，將其他有機元素不顧一切推倒剷平。參與社會運動的年青人，連八百元保釋金也負擔不來。那些家有四架靚車最近用幾十萬投得靚車牌的專業階層，肯定報以恥笑，在海景辦公室一邊歎雪茄一邊睇清場直播，七嘴八舌靈活運用英文粗口，挖苦說「呢班友仔乞兒都不如，有工唔做拖低晒就業率，正福佳！」在政治生態畸形與酷熱警報效應夾攻之下，香港人有銀用之後口音即刻變，mean了；中譯是，賤了。皇后好命水，無眼睇。