美國波士頓學院退休研究中心做咗項調查，發現年齡介於51至61歲嘅嬰兒潮一族，有成32%人冇足夠儲蓄，退休後難以維持之前嘅生活水準；研究中心主任摩尼爾話，要解決問題，惟有儲多啲錢，或者遲啲退休。
cpdiii喺《FreeRepublic討論區》大呻：「我過去40年交好多稅，仲係屬於最高稅階嗰浸，搞到我唔夠錢退休；如果美國政府將呢筆稅款連本帶利還畀我（以美股回報率作複息計算），我會好開心。」
繼續打工延遲退休
Proud_USA_Republican教路：「哈佛大學聯合住屋研究中心主任雷辛納斯嘅研究發現，美國應該畀數以百萬計非法移民入境，等佢哋喺美國置業；嬰兒潮一族可以向呢班新移民賣樓套現，然後喺佛羅里達州、亞利桑那州等地買間細啲嘅屋嚟住，咁就可以有錢過舒適嘅退休生活。」
gbs講笑咁話：「我希望嗰啲延年益壽嘅『超級抗氧化劑』快啲面世，等我可以做到130幾歲，儲多啲錢退休。」
金融機構NationwideFinancial高級副總裁密爾納話：「由於人類越嚟越長命、醫療開支急升，加上僱員儲蓄不足，嬰兒潮一族會面臨『退休危機』。佢哋應該早啲進行退休儲蓄或者投資計劃，為安享晚年做準備。」