早排紐卡素搵過曼聯嘅法國後衞施維斯達，但因為紐記有佢好唔妥嘅祖爾巴頓喺度，所以拒絕加盟。聽聞佢日前改變初衷，諗住由紅魔轉做喜鵲，點解會咁？之唔係因為好揪得嘅阿倫史密夫過咗紐記囉。
拍史密夫好揪得
喺今屆轉投紐記嘅祖爾巴頓向來躁狂，上屆打曼城嗰陣時，就喺練習賽打到佢個法國籍隊友達保入廠，事後仲俾警方起訴。由於施維斯達同達保係好朋友，於是紐記搵佢過檔都冇答應，話費事同祖爾巴頓面左左。之但係，我求大俠收到風，話阿倫史密夫上個禮拜以600萬鎊（約9,600萬港元）由曼聯過檔紐記後，令到施維斯達重新考慮轉去聖占士公園球場比賽。
咁又係，阿倫史密夫雖然唇紅齒白，成個小白臉咁，但有睇過佢踢波嘅球迷，都知道佢一啲都唔好惹，加埋之前踢曼聯、𠵱家打緊紐記嘅畢特都唔係善男信女，若然施維斯達真係加盟紐記，萬一同祖爾巴頓有起事上嚟，會係3個對1個，計落真係有着數。
再打一餐唔出奇
其實閂埋門都算一家人，但紐記球員似乎唔係咁諗。喺好耐之前，名宿舒利亞就因為唔妥隊友基利士比同領隊古列治，先後出招將佢哋兩個迫走，傳聞基利士比仲喺酒吧遭人毒打；至於戴亞同現時效力韋斯咸嘅保耶，就誇張到喺比賽時大打出手。如果施維斯達真係加盟紐記，基於佢同祖爾巴頓有牙齒印，加上有畢特同阿倫史密夫呢兩個躁底嘅前隊友傍住，我求大俠真係擔心歷史會重演。