近月睇報紙，發覺不斷有男人為女色賠上聲譽、職位，甚至性命，覺得古語「紅顏禍水」，真係好有道理。婦解人士當然會痛罵此語歧視女性，因為牛唔飲水，唔㩒得牛頭低，啲男人好色生禍，關女士乜嘢事？
吳三桂衝冠一怒為紅顏（此紅顏其實係妓女），斷送大明江山，係歷史故事。𠵱家啲好色男人冇咁巴閉，氣概差好遠，但為色所累嘅個案，不斷出現，例如（一）陳良宇包幾位情婦，逼情婦墮胎；中國現在查貪官，一定會從女人入手；（二）馬來西亞高級官員為免受蒙古女友勒索，引女友到吉隆坡，指使特工保鑣將女人綁在森林用炸藥將女人分屍，點知聰明反被聰明累，因手法太過專業，警方從炸藥來源入手，好快破案；（三）濟南官員怕情婦威脅，光天白日之下，在情婦汽車擺炸彈，汽車於鬧市爆炸，此案又係好快拉到人；（四）富商馬主好上深圳搵靚女，在酒店被女馬伕及情夫害死；（五）美國共和黨一名議員平時正經無比，說話大義凜然，似足道德重整派，點知華盛頓媽媽生嘅人客電話曝光，內有呢位正氣議員嘅電話號碼，議員唯有辭職；（六）意大利一位國會議員又係道德派，平時發表激烈反吸毒，反色情言論，呼籲重視道德，點知被人發現喺羅馬一間酒店房間內與妓女同房，而妓女藏有毒品，此議員立即辭職；（七）香港一位D3級官員X先生涉及勒索案，法庭不准報紙披露其姓名，但女被告嘅相片就見諸報章，有心人當然可以猜測到四十七名D3官員之中，扣除女性之外，邊位係X先生。
以上種種，都係男人「死」在女人手上嘅新聞，由美國、意大利、馬來西亞至中國、香港，不斷重複循環，可見普天之下嘅男性，有共同大弱點，好容易被女人控制生死。所以奉勸一啲人，平時唔好大大聲扮正義咁批判別人不道德，慎防他朝君體也相同也。
睇間諜小說，啲特務頭子最鍾意找出對手嘅弱點，弱點最大可能係女人、金錢、男人或者特殊嗜好。找出之後，就會引誘對手上當（例如用美人計），偷拍照片，以備日後之用。報紙新聞有時仲奇怪過間諜小說情節，男人可不慎乎！