近期八卦界大熱主角，肯定非袁彌明（Erica）莫屬；評盡假胸，搞到人人起哄的她，今日竟一改立場：「嘩，執過果然更加正！」不過先請大家別誤會，她並非因為口舌招尤，被封乜精物精後嚇窒轉軚，而是眼前這部執靚版的Mercedes-BenzSL500，令她對「整容加工」有新睇法而已！
記者：黎頌詩
攝影：林栢鈞
Wardrobe：GUESS
Hair：Nelson@Hair.
搶位更勝的士司機
「我承認，我係好寸！」這是訪問的開場白；不過大家別替我擔心，實情是說這句話時，Erica一點也不寸，提到惹來一大堆是非，她依然毫不動氣，「我都只係講社會現象，大家太冇幽默感，其實呢啲嘢得啖笑啫。鬧我？我唔介意！」記者有稿交，一眾八卦姨媽姑姐茶餘飯後又有話題，對男士而言，當然最期待當事人挺胸解畫，的確人人笑得出，何必認真！
不放箭，Erica一樣有殺傷力，拍照當日，路過男士個個看得兩眼冒火，我倒擔心會因而發生交通意外，連警察叔叔都似乎考慮到大家的安全而連巡3次。她說，覺得她夠殺傷力的，大概還有紐約的的士司機。「要搶位，佢哋都肯定唔係我對手，怕咗我就有！」連惡名昭彰的紐約的士大佬都忌她三分，誰敢說她不夠寸！
「係呀，女人唔可以俾人蝦，更加唔可以輸畀男人；尤其唔少中國男人，成日都覺得女人揸車唔掂，我就最唔順！如果有人想攝我位，我一定唔會俾佢上，我手車都幾辣㗎！」自信有觸覺、有方向感，更加有技術的Erica，提到那些自大男人，反而有點火。
首次揸車即撞車
只是叫人意想不到的，這位馬路惡女考牌時竟蝦碌過關，第一次開車更撞車收場！「喺美國考牌，個考牌官計錯分，於是僥倖合格。一攞到牌，朋友就借車我揸，點知唔係好慣部車個Brake，一嘢就剷埋另一部車度，好彩車速唔快。」司機係個阿婆，結果？「咪俾個阿婆鬧囉！我惟有道歉啦！」「唔發難？」我問。「寸都要寸得有道理，明明係我唔啱，我唔會死撐。」她第一部車是平實的日本房車，實際為先。「我拿了家人給我交學費的錢買，因為有實際需要嘛！」
不過講到DreamCar，她就堅持要又大又有霸氣。「我最想自己嘅車惡形惡相大大部，喺路上要一眼就見到，最好人人都怕！」擺明玩形象鮮明，提醒大家小心惡女！要收服惡女，大概就只有惡男，「我都鍾意男人有霸氣，咁先可以制住我。」
還是越整越搶鏡
不過香港路窄車多，硬要開大車簡直如跟自己作對，所以「唔會死撐」的Erica轉捧較為輕巧靈活，不過就一樣夠型夠搶的Mercedes-BenzSL500；而我們為她找來的這部SL500，是換上SLR頭冚和Carlsson胎軨，變得更靚的「整容版」。結果，她第一次不抗拒「整容」，更大讚越整越搶鏡，要即時鍊兩轉。忘了告訴大家，開車夠狠的她，曾因超速被勁罰500美元！我心慌慌上車，她興奮踩油，0至100公里只需6.3秒的辣車應聲彈出……放心，沒超速！「喺香港揸車我好守規矩，絕對係個安全駕駛者！」你以為胸大無腦，噏得就噏？大錯特錯！Erica絕對明白遊戲規則。「有啲前輩叫我繼續鬧，唔好停，話咁樣先可以Show到個性。」不過放得太盡隨時停牌，醒目的她說自會懂得選擇。
Mercedes-BenzSL500規格
引擎：4,966c.c.V8DOHC
馬力：306ps/5,600rpm
扭力：46.9kgm/2,750-4,250rpm
傳動：7G-Tronic半自動波，後輪驅動
售價：$1,140,000
查詢：富利堡汽車（28776700）