今日介紹嘅呢部車，係積木車之中屬高難度之作，事關組件多之餘，又要用電又要加氣泵，複雜指數爆燈！無論鍾唔鍾意砌車嘅人都好，總之愛砌積木嘅人都視之為挑戰，對十幾年砌積木經驗嘅Pauline嚟講，呢部車依然係最大挑戰同最有滿足感。
記者：梁美甜
攝影：伍慶泉
查詢：磚門店（81055998）
砌出高EQ
坦白講，第一眼見到MobileCrane，我真係「嘩」咗出嚟！部車大大部勁搶鏡，而且仲好鬼好玩，全部轆郁得之餘，個吊臂仲真係可以伸縮兼360度轉；之不過要砌就非常唔簡單，「砌錯一個小件或齒輪嘅時候你唔會即刻發現，到差唔多砌完嗰陣砌唔埋先知砌錯，要拆晒重新嚟過，嗰一刻真係好慘！自此發覺自己EQ越嚟越好，其實都叫賺咗㗎！」Pauline笑着說。我EQ唔好，如果我用咗七、八個鐘砌到差唔多砌完之後先知砌錯，發癲都似！咁我咪要搵盒MobileCrane砌「賺」吓EQ？「呢款係絕版嚟㗎，要搵一盒都唔容易！」
越郁越難搞
對好多砌積木發燒友嚟講，越高難度越具挑戰性嘅積木就越受歡迎，Pauline自己就係當中嘅表表者。「細個就已經砌City啲人仔、車仔同屋仔，家陣再砌就覺得太簡單；反而專揀啲多組件，比較複雜嘅款式，好似MobileCrane咁，因為好多部份都郁得，難搞得多而且比較需要Technique，砌起上嚟挑戰性就大好多。」我相信挑戰性越大，滿足感亦相對地大好多，Pauline笑住點頭表示認同！
MobileCrane
系列：TECHNIC
編號：8421
特色：車長約46cm，1,884片積木，氣體推動伸縮臂、360度轉動兼伸長達64cm，另可轉組成氣動升降𨋢。