家陣學生放暑假，唔騎呢唔玩。好似遊船河，揀架船都要有瀡滑梯，普通碧波暢泳？無興趣。好，你做初一，我做十五，就同大家潮玩近年美國好興的水中普拉提，將Yoga、Aerobics等健體運動喺晒泳池發生。咪話唔事先聲明，比喺陸上難玩好幾倍。
記者︰陸俊雄
攝影︰楊錦文
Model︰Geneieve、Mimi、Chichi、Meeco
初哥Aerobics熱身
有心學瑜伽、普拉提，就梗係想好似Madonna、鍾麗淇咁出神入化，但初學者建議跟住音樂喺水中跳吓Aerobics當熱身。唔好諗住好易，多口問聲：「你企穩未先？」到適應水阻後，就出動纖維棒（AquaNoodles）開始水中普拉提，即透過一啲道具，對深層肌肉進行力量鍛煉。
唔好心急，跳住Aerobics先。
Queenie話今日教大家用Noodles收緊肌肉。
後手出埋收背肌，睇就易，屈多兩秒都辛苦。
Hold住！Hold住！絕技老屈纖維棒。
水中屈纖維多花3倍力
水入面想Keep住屈曲纖維棒其實好難，大約比平常多花3倍力。而外國興起水中普拉提，正因為運動過程中會花上更多體力，卡路里比平常消耗至少多三分一。有4年玩水中健體經驗的導師Queenie話：「內行人都知道，其實馬會啲馬都有做水中健體，強化肌肉，所以唔係女士先啱玩。」
水中瑜伽唔怕拉親
濕咗身，梗係要試埋水中瑜伽。放底手上道具，伸展手腳玩平行。「陸上做唔到的伸延動作，水入面可以做到。」Queenie解釋：「水有阻力，令我哋花更大氣力做一個動作，但水亦有浮力，令我哋做動作時關節冇咁易受傷。」所以一直覺得玩瑜伽好難嘅朋友，改喺水入面玩，易上手之餘，成功感會大好多。
靚女玩到抽筋
幾位平日跳過吓Aerobics、玩過瑜伽的模特兒，一落場纖維棒屈多幾秒、單腳企多一陣，已經話頂唔住，仲有人玩到腳趾抽筋。
冇諗過會咁難，不過掌握到點企穩之後，好有成功感。
第一次玩呢種運動，特別係坐住條Noodles，好似吊起隻腳咁好得意。
我仲想再玩多陣㗎！係佢哋話腳軟。叫咗佢哋平日多做運動喇！
咩喎！唔覺意腳趾抽筋，一陣再玩過，我仲想再瘦啲。
平玩富貴玩意
又到番現實少少嘅問題，香港有提供水中普拉提呢類新興活動其實唔多，例如真係要去健體中心、馬會、或酒店間中提供。但據Queenie透露想玩都唔平：「市價8人1組上堂，每小時$70至$100；單人上堂，每小時約$600。」但麗豪酒店推出暑假RoomPackage，每位$438起（兩位起）可入住高級客房仲連晚餐，更有教練教你水中健體，連水中籃球都有得玩。但記得只在星期日有水中健體提供，想玩就要事先預約喇！
查詢：21321213（麗豪酒店）
