可能近排敏妮講買樓講得比較多，啱啱過咗個周末，得閒整理吓個blog時，見到網友大頭蝦留言，問有關買樓嘅意見。
佢話自己係第一次買樓，所以冇乜經驗，唔知買新樓好定舊樓好？應該買平嘅先，定係貴啲都買自己嘅心頭好呢？
壓死資金 理財大忌
淨係睇敏妮要帶埋絕代雙嬌去睇樓，就知敏妮都唔係買樓專家。不過，要解答大頭蝦嘅問題都唔係太難。
首先要答嘅係買平嘅先，定係貴啲都要買心頭好呢個問題，如果有睇過《富爸爸，窮爸爸》呢本書，就應該知道答案。本書好強調一樣嘢，就係要認清你買入嚟嘅係資產，而唔係負債。
買入負債，你要承擔沉重嘅利息開支，財務唔夠自由，犯咗精明理財嘅大忌。不過，要嚟自住嘅樓一定要啱心水，起碼要感覺舒服，所以買平先定買貴先，問題係你袋裏面有幾多錢？
如果袋裏面唔夠錢，買唔到啱心水嘅樓，不如租樓住，因為向銀行借大筆首期勉強買間靚樓，每月畀嘅利息開支，分分鐘夠你租間更靚嘅樓。何況租樓起碼唔使壓死首期嗰一筆，如果投資有道，靠呢筆首期賺返嚟嘅，分分鐘夠你每個月交租。
首重地點 平貴其次
第二個問題，買新樓定舊樓好？要數新樓同舊樓好同唔好嘅地方，夠敏妮寫幾篇稿。不過，敏妮唔慣呃稿費，都係認真啲答。買樓最緊要唔係新抑或舊，而係location（地點）。
當然呢個純粹係以保值角度出發，就以敏妮為例，自細住喺尖沙嘴，搵樓都係搵番呢區，雖然前幾個禮拜都入過將軍澳睇樓，嗰度啲樓又新、會所又靚，但敏妮最後都寧願繼續喺尖沙嘴搵。
原因係，敏妮住緊尖沙嘴層樓咁多年，除咗一啲非常時期，好似97年樓價急升、沙士時急跌之外，層樓呎價一直都keep得住。不過，如果𠵱家買層將軍澳樓，日後轉手時，莫講話有錢賺，連使唔使蝕敏妮都冇把握。
總之記住，可以保值先算係資產，如果件嘢嘅價值會隨時間損耗，頂多係生活必需品。
http://manlitalk.com/blogs/