今年係日本侵華70周年，保釣行動委員會今個月12號再上征途，預計15號再闖釣魚台，釣魚台二號已整裝待發，噚日載埋十幾個保釣勇士到果洲群島練水，希望操fit啲，一鼓作氣登上釣魚台。
今次遠征釣魚台嘅20名勇士中，最少有兩張新面孔，包括年僅22歲嘅應屆浸大畢業生梁錦威，另一張新面孔年紀只得兩個半月大，叫做金仔。金仔唔係BB，而係一隻唐狗仔，由保釣會成員羅就執番嚟，交畀主席陳多偉飼養。
偉哥特登幫金仔做咗件寫上「日本滾出釣魚台」嘅戰衣，希望佢成為首隻踏足釣魚台嘅唐狗，名留青史，最好上岸後屙篤尿，咁釣魚台唔單止係中國領土，仲係「唐」狗地頭，偉哥透露仲有來自海外嘅女保釣勇士同行。保釣會除咗會用快艇登島，可能首次潛水搶灘，八方祝佢哋一路順風，平安歸來。