好多人都知，工銀亞洲（349）董事兼副總經理黃遠輝（Stanley）興趣多多，耕田種瓜、考古、畫畫、品茗、攝影，樣樣啱，但比較少人知嘅係，原來佢細個鍾意捉棋，但成績就……
同好多𡃁仔一樣，Stanley細個嗰陣由玩鬥獸棋開始，佢話：「成日以為匿埋喺個獸穴度，可以唔使俾人嗒，但最後咪又係要行返出嚟，仲要俾人剝光豬。」
到大個啲、人又進步啲就玩波子棋，但棋藝一樣麻麻哋，「淨係識一味向前跳，到剩番最後兩粒，焗住逐步逐步行。」咁玩法梗係衰收尾啦！
以為贏 都係輸
玩厭咗波子棋，進階就係捉象棋。鬥獸棋同波子棋都玩得咁屎，應該有自知之明，點知Stanley居然叻到同人夾份去街邊破殘局。
點解咁夠膽？佢話：「當年見到個殘局，就走去睇書拆局，又畀我搵到喎，咁咪記實啲棋步，跟手同另外兩個同學仔夾咗5蚊，當時好多㗎喇！」一心諗住贏梗，點知人家出得嚟擺檔，點會俾你班靚仔拆招牌，檔主見招拆招，最終雖然打和，但破唔到殘局挑戰者都當輸，就係咁，輸咗五皮，財散人安樂！
陳年普洱 唔捨得飲
睇怕Stanley都係冇乜捉棋天份，但品茗就唔同，十幾年前用幾千蚊買嘅普洱茶餅，家吓升值到8萬幾蚊，不過佢話呢啲都係數字遊戲，佢真係買番嚟飲，唔係用嚟炒。
至於幾時飲？佢話一定要搵到個好好嘅藉口，先至捨得冲嚟飲，因為名普洱越陳年價越高，可以話啖啖都係錢。佢都曾經用過唔少藉口，包括2000年慶祝千禧、結婚周年紀念，好明顯呢啲都唔係好藉口，因為講到家吓超過7年都仲未捨得飲，睇怕要等到阿女出嫁時，冲杯外父茶飲，呢個藉口應該夠力。
[email protected]