全球最大快餐連鎖店麥當勞早排俾個中國律師起訴。呢位姓單嘅律師今年5、6月喺北京幫襯麥當勞之後，發覺張發票竟然大部份用英文寫，而唔係中文，好多項目都睇唔明，於是告麥當勞侵犯消費者知情權，仲要求登報道歉，同象徵式賠償1蚊人民幣。
AlterKaker喺《FreeRepublic討論區》講：「我支持呢個律師，正如美國境內嘅墨西哥餐廳，如果唔提供英文賬單，亦可能會俾人告。」chaos_5話：「呢個律師應該學吓歐美人士，爭取多啲賠償。佢應該要求麥當勞賠償6000萬人民幣嘅精神痛苦損失。」
照顧不同民族語言
Dr.Martin呻：「美國政府冇照顧少數民族嘅語言需要，例如我老婆早排去考車牌筆試，但張試卷淨係得英文同西班牙文，佢睇唔明，諗住告政府。」thefactor反駁：「政府好難全面照顧所有少數民族嘅需要，唔通啲路牌要同時用幾十種文字咩？」佢批評美國人太鍾意打官司，令唔少公司乘機加價，為將來可能被罰款做好準備。
麥當勞辯稱：「告我哋嘅發票唔用中文，唔公平，因為我哋嘅廣告同餐單都有用中文，餐廳員工都係講中文，由7月起，麥當勞北京分店嘅發票亦已經改用中文。」
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]