當全世界嘅公司都爭住擠入中國分一杯羮，內地企業就搶先走出去望打響名堂。蒙牛（2319）喺呢方面一啲都冇執輸，由成立到家吓不過8年，產品已出口到香港、澳門，遠嘅仲有東南亞、美國及加拿大，最近仲踩到去俄羅斯㖭。
據內地《北京晚報》報道，蒙牛同俄羅斯企業促進俄中經貿關係協會、新鮮線路公司分別簽署咗合作協議，齊齊開發俄羅斯市場。
報道話，俄羅斯人長期食用乳製品，人均乳品消費量達370公斤，乳製品產量喺全球排第四，咁大個餅，蒙牛主席牛根生點會放過吖，預計到咗10月，首批蒙牛牛奶就打入莫斯科嘅零售點，產品主要係常溫牛奶。
除俄羅斯本土出品品牌外，蒙牛仲要面對唔少強勁嘅對手，包括雀巢、達能等歐洲著名乳品品牌，佢哋到埗早啲，喺俄羅斯市場已相當活躍，加埋蒙牛，相信競爭會非常激烈。呢塊餅，就算畀你埋到位爭，爭到幾大份都要睇你夠唔夠牙力。