香港回歸10周年主題曲《始終有你》畀香港人踩到體無完膚，不過卻好啱北京口味，作曲嘅金培達同填詞人陳少琪獲北京欽點，創作奧運倒數一周年主題曲。新歌叫《WeAreReady》，噚日正式出街，八方一睇歌詞，發現可能暗藏玄機，金培達同少琪可能想畀番個交代香港人，我哋唔單止ready奧運，亦ready民主普選。
建議做7.1主題曲
《始終有你》係政治宣傳歌，香港人梗係唔啱聽，呢首《WeAreReady》就順耳得多，「一年一年的等待，我們看見未來，一起用汗水來灌溉。」香港人等待普選多年，每年7.1都用汗水嚟爭取民主，少琪果然係金牌填詞人，呢幾句歌詞港人實有共鳴；跟住嗰兩句仲感人，「這片土地已經準備好，打開夢想起飛的跑道。」係人都知香港完全ready普選，今日舉行都得，一天一天、一秒一秒咁等待，真係令我哋好失望，少琪寫出港人心願，八方好佩服你。
上次將《始終有你》改編做《福佳始終有你》嘅博客林忌，噚日上網聽完《WeAreReady》都擊節讚賞，話歌詞句句到肉，直情係港人心聲；佢更陰謀論咁話，中國對奧運宣傳監控好嚴密，呢首內容極端「反動」嘅歌竟然出到街，肯定另有內情。
林忌同Freeman炮製嘅《福街》唱到街知巷聞，有超過74萬人上YouTube睇過，佢哋話會整個爭取普選版《WeAreReady》MV，八方建議佢哋搵馬丁、華叔、余若薇、陳樞機、梁家傑同肥佬黎等民主icons，每人唱一句weareready，作為下年7.1遊行主題曲。
《WeAreReady》由133個兩岸三地歌手合唱，香港代表有譚校長、克勤、Eason、梁詠琪等等，內地有黃曉明、周筆暢，台灣有蕭亞軒、黃大煒，據講係20年嚟最多歌手參與嘅大合唱，今個月8號一眾歌星會喺天安門舉行嘅奧運倒數一周年大騷度表演。金培達同少琪話只係用咗18個鐘頭就搞掂曲詞，最特別係加入永樂大鐘鐘聲做前奏，添加中國特色。上次《福街》面世後，港府怕俾人恥笑唔敢多播官方版，八方希望《WeAreReady》唔會變成禁歌啦。
《WeAreReady》
曲：金培達 詞：陳少琪
一年一年的等待我們看見未來
一起用汗水來灌溉五種色彩
一天一天的等待心情更加澎湃
創造最大的舞台最豪邁的時代
這片土地已經準備好打開夢想起飛的跑道讓全世界的目光降落在我們的懷抱
WeAreReady把心和心都連在一起
WeAreReady把天與地都連在一起
超越了自己贏得一場光榮的勝利
用時間紀念夢想的神奇
WeAreReady一分一秒的等待這刻終於到來漫天燦爛的煙花在驕傲的盛開
這個民族已經準備好帶著笑容來向你問好
讓全世界的目光降落在我們的懷抱